ആലുവ: സേലത്ത് നിന്നും കഞ്ചാവുമായി വന്ന മൂന്ന് പേരെ പൊലിസ് ആലുവ റെയില്‍വേ സ്റ്റേഷന് സമീപത്ത് നിന്നും ഓടിച്ചിട്ട് പിടികൂടി. ഇവരില്‍ നിന്നും 320 ഗ്രാം കഞ്ചാവും പിടിച്ചെടുത്തു. മൂവാറ്റുപുഴ മുനിസിപ്പല്‍ സ്റ്റേഡിയത്തിന് സമീപം തോട്ടുങ്കല്‍ വീട്ടില്‍ പോള്‍ (22), ടി.ടി.സി കവലയ്ക്ക് സമീപം ഓലില്‍ വീട്ടില്‍ ബേസില്‍ (23), കുന്നത്തുനാട് പള്ളിക്കര പ്ലാഞ്ചോട്ടില്‍ വീട്ടില്‍ ബിബിന്‍ ജോണ്‍ (23) എന്നിവരെയാണ് പിടികൂടിയത്.
ഇന്നലെ രാവിലെ ആറരയോടെയാണ് ആലുവ റെയില്‍വേ സ്റ്റേഷന് മുന്‍വശത്ത് നിന്നും പോളും ബേയ്‌സിലും പിടിയിലാകുന്നത്. പൊലിസിന് പിടികൊടുക്കാതെ ഓടിരക്ഷപ്പെടാന്‍ ശ്രമിച്ചെങ്കിലും നടന്നില്ല. 15 മിനിറ്റിന് ശേഷമാണ് മൂന്നാമനെ പമ്പ് കവല റോഡില്‍ നിന്നും പൊലിസ് പിടികൂടിയത്. റൂറല്‍ എസ്.പി എ.വി ജോര്‍ജിന് ലഭിച്ച രഹസ്യ വിവരത്തെ തുടര്‍ന്ന് റൂറല്‍ ടൈഗര്‍ ഫോഴ്‌സിന്റെയും ആലുവ പൊലിസിന്റെയും സംയുക്ത ഓപ്പറേഷനിലാണ് പ്രതികള്‍ കുടുങ്ങിയത്.
സേലത്ത് നിന്നും ട്രെയിന്‍മാര്‍ഗമാണ് കഞ്ചാവ് എത്തിച്ചിരുന്നതെന്നും വിദ്യാര്‍ഥികള്‍ ഉള്‍പ്പെടെയുള്ളവര്‍ക്കാണ് വിതരണം ചെയ്യുന്നതെന്നും പ്രതികള്‍ പൊലിസിനോട് പറഞ്ഞു.