ടൂറിന്‍: നാല് വര്‍ഷത്തെ ഇടവേളയ്ക്ക് ശേഷം മരിയോ ബെലോട്ടെല്ലി ഇറ്റലി ദേശീയ ടീമില്‍. 2014ലെ ലോകകപ്പിന്റെ ഗ്രൂപ്പ് സ്റ്റേജില്‍ തന്നെ ഇറ്റലി പുറത്തായ ശേഷം ബെലോട്ടെല്ലി ദേശീയ കുപ്പായമണിഞ്ഞിട്ടില്ല. 2014 നവംബറില്‍ അന്നത്തെ പരിശീലകന്‍ അന്റോണിയോ കോണ്ടെ ബെലോട്ടെല്ലിയെ ടീമില്‍ ഉള്‍പ്പെടുത്തിയിരുന്നെങ്കിലും പരുക്കിനെ തുടര്‍ന്ന് കളത്തിലിറങ്ങാന്‍ സാധിച്ചില്ല. പുതിയ പരിശീലകനായി കഴിഞ്ഞ ദിവസം ചുമതലയേറ്റ റോബര്‍ട്ടോ മാന്‍സിനിയാണ് താരത്തെ തിരികെ വിളിച്ചത്.
സഊദി അറേബ്യ, ഫ്രാന്‍സ് ടീമുകള്‍ക്കെതിരായ സൗഹൃദ മത്സരങ്ങള്‍ക്കുള്ള ടീമിലേക്കാണ് 27കാരനായ മുന്നേറ്റ താരത്തെ ഉള്‍പ്പെടുത്തിയത്. ഇറ്റലിക്കായി 33 മത്സരങ്ങള്‍ കളിച്ചിട്ടുള്ള ബെലോട്ടെല്ലി 13 ഗോളുകളും നേടിയിട്ടുണ്ട്. നിലവില്‍ ഫ്രഞ്ച് ടീം നീസിനായാണ് ഇറ്റാലിയന്‍ മുന്നേറ്റ താരം കളിക്കുന്നത്. നേരത്തെ മാന്‍സിനി മാഞ്ചസ്റ്റര്‍ സിറ്റി, എ.സി മിലാന്‍ ടീമുകളുടെ പരിശീലകനായിരുന്നപ്പോള്‍ രണ്ട് ടീമിലും ബെലോട്ടല്ലി കളിച്ചിരുന്നു. ഈ മാസം 28നാണ് ഇറ്റലി- സഊദി സൗഹൃദ പോരാട്ടം.