ലണ്ടന്‍: ചെല്‍സിക്ക് ആശ്വാസമായി. ഒപ്പം അന്റോണിയോ കോണ്ടെയ്ക്കും. സീസണില്‍ കിരീട നേട്ടത്തോടെ തന്നെ കോണ്ടെയ്ക്ക് ചെല്‍സിയില്‍ നിന്ന് വിട പറയാനുള്ള അവസരം ഈദന്‍ ഹസാദ് ഒരുക്കിക്കൊടുത്തു. ഇംഗ്ലീഷ് എഫ്.എ കപ്പ് കിരീടം മാഞ്ചസ്റ്റര്‍ യുനൈറ്റഡിനെ 1-0ത്തിന് വീഴ്ത്തി ചെല്‍സി സ്വന്തമാക്കി. കളിയുടെ 22ാം മിനുട്ടില്‍ ലഭിച്ച പെനാല്‍റ്റി വലയിലാക്കിയാണ് ഹസാദ് നിര്‍ണായക ഗോളിലൂടെ ടീമിന് കിരീട വിജയം സമ്മാനിച്ചത്. ഹസാദിനെ ഫില്‍ ജോണ്‍സ് ബോക്‌സില്‍ വച്ച് ഫൗള്‍ ചെയ്തതിനാണ് ചെല്‍സിക്കനുകൂലമായി റഫറി പെനാല്‍റ്റി അനുവദിച്ചത്. കിക്കെടുത്ത ബെല്‍ജിയം താരം പിഴവില്ലാതെ പന്ത് വലയിലാക്കി.
ഒരു ട്രോഫിയുമില്ലാതെ സീസണ്‍ അവസാനിപ്പിച്ചാണ് മാഞ്ചസ്റ്റര്‍ യുനൈറ്റഡിന്റെ മടക്കം. ലോകത്തിലെ മികച്ച താരങ്ങളെ തന്നെ മധ്യനിരയിലും മുന്നേറ്റത്തിലും കൊണ്ടുവന്ന് ടീമിനെ സൂപ്പര്‍ സംഘമാക്കി മാറ്റിയ മൗറീഞ്ഞോയ്ക്ക് പക്ഷേ അതൊന്നും ഇത്തവണ ഫലവത്താക്കാന്‍ സാധിക്കാതെ പോയി.
2016ല്‍ ചെല്‍സിയുടെ കോച്ചായി എത്തിയ അന്റോണിയോ കോണ്ടെ ആ സീസണില്‍ അവരെ പ്രീമിയര്‍ ലീഗ് കിരീടത്തിലേക്ക് നയിച്ചിരുന്നു. എന്നാല്‍ നടപ്പ് സീസണില്‍ ടീമിന്റെ പ്രകടനം അത്ര മികച്ചതായിരുന്നില്ല. അവസാന കച്ചിത്തുരുമ്പായിരുന്നു ഇറ്റാലിയന്‍ കോച്ചിനെ സംബന്ധിച്ച് എഫ്.എ കപ്പ്.