ചെറുപുഴ: സമയ തര്‍ക്കത്തെ തുടര്‍ന്ന് ബസ് ജീവനക്കാര്‍ തമ്മില്‍ പുളിങ്ങോം ടൗണില്‍ ഏറ്റുമുട്ടി. പയ്യന്നൂരില്‍നിന്നും കോഴിച്ചാലിലേക്കു പോയ ബുറാക്ക് ബസിലേയും ചെറുപുഴയില്‍നിന്നും തയ്യേനിയിലേക്ക് പോകുകയായിരുന്ന സെവന്റ്റി ടു ബസിലേയും ജീവനക്കാര്‍ തമ്മിലാണ് ഉച്ചയക്ക് രണ്ടോടെ ഏറ്റുമുട്ടിയത്.
 ടൗണില്‍ ബസ് കാത്തുനിന്നിരുന്ന സ്ത്രീകളുള്‍പ്പെടെയുള്ള യാത്രക്കാര്‍ ഇതുകണ്ട് ഭയന്നുമാറുകയായിരുന്നു. ഏറെനേരം സ്ഥലത്ത് സംഘര്‍ഷാവസ്ഥ നിലനിന്നു. നാട്ടുകാര്‍ വിവരമറിയിച്ചതിനെതുടര്‍ന്ന് ചെറുപുഴയില്‍നിന്നും പൊലിസെത്തി ഇരുവിഭാഗത്തേയും സ്റ്റേഷനിലേക്ക് വിളിപ്പിച്ചു. പയ്യന്നൂര്‍ ചെറുപുഴ പുളിങ്ങോം റൂട്ടില്‍ സമയ തര്‍ക്കത്തെ തുടര്‍ന്ന് ബസ് ജീവനക്കാര്‍ തമ്മിലുള്ള വാക്കേറ്റവും സംഘര്‍ഷവും നിത്യ സംഭവമാണ്. ഈ റൂട്ടില്‍ ബസുകളുടെ മത്സര ഓട്ടം നിയന്ത്രിക്കുവാനും അധികൃതര്‍ക്ക് ഇതുവരെ കഴിഞ്ഞിട്ടില്ല.