വനം വകുപ്പ് അധികൃതരും മട്ടന്നൂരില്‍ നിന്ന് പൊലിസും വീട്ടിലെത്തി പരിശോധന നടത്തി
മട്ടന്നൂര്‍: മരുതായി മേറ്റടിയില്‍ വളര്‍ത്തു നായ്ക്കളെ അഞ്ജാത ജീവി കടിച്ചു കൊന്നു. ഇന്നലെ പുലര്‍ച്ചെയാണ് മേറ്റടിയിലെ കെ.പി മനോജ് കുമാറിന്റെ വീട്ടില്‍ വളര്‍ത്തുന്ന നായ കുഞ്ഞുങ്ങളെ ചത്ത നിലയില്‍ കണ്ടെത്തിയത്. മറ്റൊന്നിന് കടിയേറ്റു. വീടിനു പിറകിലുള്ള വിറകുപുരയിലാണ് രാത്രിയില്‍ നായകളെ കെട്ടിയിടാറുള്ളത്. പുലര്‍ച്ചെ അഞ്ചോടെ നായകളുടെ നിലവിളി ശബ്ദം കേട്ടു ഉണര്‍ന്ന വിട്ടുകാര്‍ നോക്കിയപ്പോള്‍ ഒരു ജീവി വിറകുപുരയില്‍ നിന്ന് പുറത്തേക്ക് ചാടിപോയതായി പറയുന്നു. വലിയ നായയ്ക്ക് കടിയേല്‍ക്കുകയും രണ്ട് കുഞ്ഞുങ്ങള്‍ കടിയേറ്റ് ചത്ത നിലയിലുമാണ് കണ്ടത്. പുലിയാണെന്ന അഭ്യൂഹത്തെ തുടര്‍ന്ന് കണ്ണൂരില്‍ നിന്ന് വനം വകുപ്പ് അധികൃതരും മട്ടന്നൂരില്‍ നിന്ന് പൊലിസും വീട്ടിലെത്തി പരിശോധന നടത്തി. കഴിഞ്ഞ ദിവസം മണക്കായില്‍ പുലിയെ കണ്ടെന്ന വാര്‍ത്തയും ജനങ്ങളെ ഭീതിയിലാഴ്ത്തിയിരിക്കുകയാണ്.