കുട്ടനാട്: നാടകത്തെയും നാടന്‍പാട്ടിനെയും അവസാനശ്വാസംവരെ നവീകരിക്കാന്‍ ശ്രമിച്ച കാവാലം നാരായണപ്പണിക്കര്‍ മണ്ണിനോടും മനുഷ്യനോടും വിടപറഞ്ഞു. സംഗീതത്തിലും അഭിനയശാസ്ത്രത്തിലുമൊക്കെ തന്റേതായ മുഖമുദ്ര പതിപ്പിച്ചാണു നാരായണപ്പണിക്കര്‍ കാവാലത്തിന്റെ പേരുകൂടി കലാലോകത്തിനു സമ്മാനിച്ചത്. കാവാലം എന്ന സ്ഥലപ്പേര് കേള്‍ക്കുന്ന മലയാളിയുടെ മനസില്‍ ആദ്യം ഓടിയെത്തുന്നത് നാടന്‍പാട്ടിന്റെ ഈരടികളും കാവാലം നാരായണപ്പണിക്കരുടെ മുഖവും രൂപവുമാണ്. അക്ഷരങ്ങളും കലയും പാട്ടുമൊന്നുമില്ലാത്ത ലോകത്തേക്ക് കാവാലം മറഞ്ഞെങ്കിലും ആ ജീവിതം പകര്‍ന്നുനല്‍കിയ കലാസ്വാദനത്തിന്റെ പുത്തന്‍തുരുത്തുകള്‍ പച്ചയായി തന്നെ നിലനില്‍ക്കും. ഉയര്‍ച്ചയുടെ പടവുകള്‍ ഒന്നായി നടന്നുകയറിയപ്പോഴും ജന്‍മനാടിനെക്കുറിച്ചുള്ള ചിന്തകള്‍ എപ്പോഴും കാവാലത്തിനുണ്ടായിരുന്നു. നാട്ടില്‍ കുരുന്നുകള്‍ക്കായി വേനല്‍ക്കാല കൂട്ടായ്മകള്‍ സംഘടിപ്പിച്ചു വരവെയാണ് ഈ നാടകാചാര്യന് അവശതയുണ്ടാകുന്നത്. നാട്ടിലെ കുരുന്നുകളെ കലാലോകത്തേക്കു താളംപകര്‍ന്ന് എത്തിക്കുകവഴി മാത്രമേ കാവാലത്ത്‌നിന്ന് ഇനിയും നാടന്‍കലകളുടെ വേറിട്ട ശബ്ദമുയരൂ എന്ന് കാവാലം തിരിച്ചറിഞ്ഞിരുന്നു. കാവാലത്തിന്റെ നാവില്‍നിന്നു കേട്ടുപഠിച്ച നാടന്‍പാട്ടിന്റെ ഈരടികളും താളത്തിന്റെ ചടുതലകളും മാത്രമാണ് ഈ കുരുന്നുകൂട്ടങ്ങള്‍ക്ക് ഇനി കൂട്ട്. ശ്രീ ഗണപതിയുടെ തിരുനാമക്കുറി കേട്ടുണരാന്‍ ഇനി കാവാലം എന്ന ഗ്രാമത്തിനൊപ്പം നാരായണപ്പണിക്കരില്ല.