കൊടുങ്ങല്ലൂര്‍: മദ്യലഹരിയില്‍ വീടാക്രമിച്ചയാളെ നാട്ടുകാര്‍ പിടികൂടി കെട്ടിയിട്ടു, പിന്നീട് പൊലിസിന് കൈമാറി. മതിലകം പുതിയകാവ് സ്വദേശി ഷെമീറിനെയാണ് നാട്ടുകാര്‍ പിടികൂടിയത്. ചൊവ്വാഴ്ച്ച അര്‍ദ്ധരാത്രിയോടെയായിരുന്നു സംഭവം. ബുധനാഴ്ച ഗള്‍ഫിലേക്ക് പോകേണ്ടിയിരുന്ന ഇയാള്‍ മദ്യ ലഹരിയില്‍ കൊടുങ്ങല്ലൂര്‍ ചന്തപ്പുര കരിശ്ശാംകുളത്തിന് സമീപമുള്ള സത്യന്‍ എന്നയാളുടെ വീടിനു നേരെ ആക്രമണം നടത്തുകയായിരുന്നു.
തല കൊണ്ടിടിച്ച് ഇയാള്‍ വീടിന്റെ ജനല്‍ചില്ലുകള്‍ തകര്‍ത്തു.
വീട്ടുടമയും അയല്‍വാസികളും ചേര്‍ന്ന് ഇയാളെ കെട്ടിയിട്ട് പൊലിസില്‍ അറിയിക്കുകയായിരുന്നു. തലയ്ക്ക് പരുക്കേറ്റ ഷമീറിനെ കൊടുങ്ങല്ലൂര്‍ താലൂക്ക് ആശുപത്രിയില്‍ പ്രഥമ ശുശ്രുഷ നല്‍കിയ ശേഷം തൃശൂര്‍ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.
വീടാക്രമിച്ചതിന് ഷെമീറിനെതിരേയും ഇയാളെ മര്‍ദിച്ചതിന് കണ്ടാലറിയാവുന്ന അഞ്ച് പേര്‍ക്കെതിരേയും പൊലിസ് കേസെടുത്തു.