നീലേശ്വരം: ഭിന്നശേഷിക്കാരെ അധിക്ഷേപിച്ച കൗണ്‍സിലര്‍ മാപ്പ് പറയണമെന്ന് ഡിഫ്രന്റ്‌ലി ഏബിള്‍ഡ് പേഴ്‌സണ്‍സ് വെല്‍ഫെയര്‍ ഫെഡറേഷന്‍ നീലേശ്വരം ഏരിയാ കമ്മിറ്റി ആവശ്യപ്പെട്ടു. നഗരസഭാ കൗണ്‍സില്‍ യോഗത്തില്‍ ഭിന്നശേഷിക്കാര്‍ക്കെതിരേ കോണ്‍ഗ്രസ് കൗണ്‍സിലര്‍ ടി.പി ബീന നടത്തിയ മോശം പരാമര്‍ശം പിന്‍വലിച്ച് ക്ഷമാപണം നടത്തണമെന്നും അല്ലാത്തപക്ഷം നിയമ നടപടികളുമായി മുന്നോട്ടുപോകുമെന്നും സംഘടന വാര്‍ത്താകുറിപ്പിലൂടെ അറിയിച്ചു.
സംഭവത്തില്‍ സംഘടന പ്രതിഷേധവും അറിയിച്ചു. കഴിഞ്ഞ വെള്ളിയാഴ്ച നടന്ന കൗണ്‍സില്‍ യോഗത്തില്‍ തൈക്കടപ്പുറം സുനാമി കോളനി റോഡ് ഭിന്നശേഷിക്കാര്‍ ഉള്‍പ്പെടെയുള്ള സമീപവാസികള്‍ക്ക് നിഷേധിക്കുന്നതായുള്ള പരാതി ചര്‍ച്ചയ്ക്കു വന്നപ്പോഴാണ് ടി.പി ബീന വിവാദപരമായ പരാമര്‍ശം നടത്തിയത്. ഇതിനെതിരേ കൗണ്‍സില്‍ യോഗത്തില്‍ തന്നെ പ്രതിഷേധവും ഉയര്‍ന്നിരുന്നു.