ന്യൂഡല്‍ഹി: ഗുരുഗ്രാം റയാന്‍ സ്‌കൂളില്‍ രണ്ടാം ക്ലാസുകാരനെ സ്‌കൂളിലെ ബാത്‌റൂമില്‍ കഴുത്തറുത്ത് കൊന്ന കേസില്‍ പ്രതിയായ 16 കാരനെ മുതിര്‍ന്നയാളായി കണക്കാക്കി വിചാരണചെയ്യാമെന്ന് കോടതി. കുട്ടികള്‍ക്കായുള്ള പ്രത്യേക കോടതിയുടെതാണ് വിധി.  

കഴിഞ്ഞ വര്‍ഷം ഡിസംബര്‍ 20ന് ജുവനൈല്‍ ജസ്റ്റിസ് ബോര്‍ഡ് പുറപ്പെടുവിച്ച വിധി പ്രത്യേക കോടതി അംഗീകരിക്കുകയായിരുന്നു. ജുവനൈല്‍ ജസ്റ്റിസ് ബോര്‍ഡിന്റെ വിധിയെ ചോദ്യം ചെയ്ത് നല്‍കിയ അപ്പീല്‍ കോടതി തള്ളി. പ്രതിയെ കസ്റ്റഡിയിലെടുക്കാന്‍ സി.ബി.ഐയെ അനുവദിച്ച നടപടിയെ ചോദ്യം ചെയ്ത് നല്‍കിയ രണ്ട് ഹരജികളും കോടതി തള്ളി.

ജുവനൈല്‍ ബോര്‍ഡിന്റെ വിധി നിയമ വ്യവസ്ഥ ദോഷമാണെന്നും തന്റെ ഭാഗം അവതരിപ്പിക്കാന്‍ പ്രതിക്ക് വേണ്ടത്ര അവസരം നല്‍കാതെയാണ് ബോര്‍ഡ് വിധി പുറപ്പെടുവിച്ചതെന്നും പ്രതിക്ക് വേണ്ടി ഹാജരായ അഭിഭാഷകന്‍ കോടതിയെ അറിയിച്ചിരുന്നു.

എന്നാല്‍ പ്രതി ചെയ്തത് ഹീനമായ കുറ്റകൃത്യമാണെന്ന് ചൂണ്ടിക്കാട്ടിയാണ് പ്രത്യേക കോടതി ജുവനൈല്‍ബോര്‍ഡിന്റെ വിധി ശരിവെക്കുകയായിരുന്നു.

കഴിഞ്ഞ വര്‍ഷം സെപ്തംബര്‍ എട്ടിനായിരുന്നു രാജ്യത്തെ നടുക്കിയ സംഭവം. സ്‌കൂളില്‍ പരീക്ഷയും പി.ടി.എ യോഗവും മാറ്റിവെക്കുന്നതിനാണ് 11ാം ക്ലാസുകാരന്‍ അതേ സ്‌കൂളിലെ രണ്ടാം ക്ലാസ് വിദ്യാര്‍ഥിയുടെ കഴുത്തറുത്ത് കൊന്നത്.