കുമളി: പെരിയാര്‍ കടുവാ സങ്കേതത്തിലെ പാമ്പുപിടുത്തക്കാരന് മൂര്‍ഖന്‍ പാമ്പിന്റെ കടിയേറ്റു.
ഇന്നലെ രാവിലെ എട്ടോടെ വനത്തിനുള്ളിലെ മണക്കവലയില്‍ വനം വകുപ്പ് ഉദ്യോഗസ്ഥര്‍ താമസിക്കുന്ന ക്വാര്‍ട്ടേഴ്‌സില്‍ വച്ചാണ് പാമ്പുപിടുത്തക്കാരനായ അബീഷിന് (30) കടിയേറ്റത്. പാചകം ചെയ്യാനും മറ്റുമായി മുറിക്കുള്ളില്‍ സൂക്ഷിച്ചിരുന്ന വിറകിനുളളിലുണ്ടായിരുന്ന പാമ്പിന്റെ മേല്‍ അബീഷ് അബദ്ധത്തില്‍ ചവിട്ടുകയായിരുന്നു. അബീഷിന്റെ കാലിന്റെ അണിവിരലിലാണ് പാമ്പ് കടിച്ചത്. വനത്തിനുള്ളില്‍ വച്ച് തന്നെ ഒപ്പമുണ്ടായിരുന്നവര്‍ പ്രാഥമിക ചികിത്സ നടത്തി. ഇതിനിടെ തന്നെ കടിച്ച മൂര്‍ഖന്റെ ചിത്രം മൊബൈല്‍ ഫോണില്‍ പകര്‍ത്താനും അബീഷ് മറന്നില്ല. തുടര്‍ന്ന് സ്പീഡ് ബോട്ടില്‍ അബീഷിനെ തേക്കടിയില്‍ എത്തിച്ചു. ഇവിടെ നിന്ന് വനംവകുപ്പിന്റെ ആംബുലന്‍സില്‍ കുമളിയിലെ ആശുപത്രികളില്‍ എത്തിച്ചെങ്കിലും ഇവിടെ ആന്റിവെനം ഇല്ലാത്തതിനാല്‍ പീരുമേട് താലൂക്ക് ആശുപത്രിയിലേക്ക് കൊണ്ടുപോയി. ഇപ്പോള്‍ കോട്ടയത്തെ സ്വകാര്യ ആശുപത്രിയില്‍ നിരീക്ഷണത്തിലാണ്. ഏതാനും വര്‍ഷത്തിനുള്ളില്‍ ആയിരത്തോളം പമ്പുകളെയാണ് അബീഷ് പിടികൂടി വനത്തിനുള്ളില്‍ വിട്ടത്. നാട്ടില്‍ പാമ്പ് പിടിച്ച് നടന്നിരുന്ന അബീഷിന് ഇവയോടുള്ള സ്‌നേഹം മനസ്സിലാക്കിയതോടെ അന്നുണ്ടായിരുന്ന ഉദ്യോഗസ്ഥര്‍ പെരിയാര്‍ കടുവാ സങ്കേതത്തിലെ പാമ്പ് പിടുത്തക്കാരനായി നിയമിക്കുകയായിരുന്നു.