കൊടുങ്ങല്ലൂര്‍: പ്രായപൂര്‍ത്തിയാകാത്ത പ്ലസ്ടു വിദ്യാര്‍ഥിനിയെ ലൈംഗികമായി പീഡിപ്പിക്കാന്‍ ശ്രമിച്ച സംഭവത്തില്‍ മൂന്ന് പേരെ പൊലിസ് അറസ്റ്റുചെയ്തു. കാവില്‍ക്കടവ് സ്വദേശി രാഹുല്‍ (18), സുഹൃത്ത് എറിയാട് സ്വദേശി വൃജില്‍ (18), പ്രായപൂര്‍ത്തിയാകാത്ത മറ്റൊരു പ്ലസ് ടുവിദ്യാര്‍ഥി എന്നിവരെയാണ് പൊലിസ് അറസ്റ്റ് ചെയ്തത്.
പ്രയപൂര്‍ത്തിയാകാത്ത വിദ്യാര്‍ഥിയെ വെള്ളിയാഴ്ച തൃശ്ശൂര്‍ ജുവനൈല്‍ കോടതിയില്‍ ഹാജരാക്കി. മറ്റ് രണ്ടുപേരെ ശനിയാഴ്ച കോടതിയില്‍ ഹാജരാക്കും.
ഇവരോടൊപ്പം കണ്ടെത്തിയ പെണ്‍കുട്ടിയെ രക്ഷിതാക്കള്‍ക്കൊപ്പം വിട്ടു. കാവില്‍ക്കടവ് സ്വദേശി രാഹുലുമായി ഈ പെണ്‍കുട്ടി കഴിഞ്ഞ ഒരുവര്‍ഷമായി പ്രണയത്തിലായിരുന്നുവെന്നും പൊലിസ് പറഞ്ഞു.വ്യാഴാഴ്ച വൈകീട്ട് മൂന്നരയോടെയാണ് എറിയാടുള്ള വീട്ടില്‍ നിന്നും നാട്ടുകാര്‍ ചേര്‍ന്ന് പൊലിസിനെ വിളിച്ചുവരുത്തി ഇവരെ പിടികൂടിയത്. വീട്ടുടമസ്ഥന്‍ സ്ഥലത്തില്ലാതിരുന്ന സമയത്ത് ഉച്ചക്ക് ഒന്നരയോടെ ഒരു കാറില്‍ പെണ്‍കുട്ടിയടക്കം നാലംഗസംഘം എത്തുകയായിരുന്നു.
സംശയം തോന്നിയ സ്ത്രീകളടക്കമുള്ള നാട്ടുകാരും ചില പഞ്ചായത്ത് അംഗങ്ങളും ചേര്‍ന്ന് ഈ വീട്ടിലെത്തി കുട്ടികളെ ചോദ്യം ചെയ്തു. സ്ത്രീകളില്‍ ചിലര്‍ വീടിനകത്ത് കയറി പെണ്‍കുട്ടിയെ പരിശോധിക്കുകയും സംശയം തോന്നിയതിനെ തുടര്‍ന്ന് ഇവരെ തടഞ്ഞുവെച്ച് പൊലിസിനെ വിവരം അറിയിക്കുകയായിരുന്നു.