ഇരിട്ടി: ആറളം ഫാമിലെ കാര്‍ഷിക നഴ്‌സറിയില്‍ കാട്ടാനക്കൂട്ടമിറങ്ങി പോളി ഹൗസും വില്‍പ്പനക്കായി തയാറാക്കിയ തെങ്ങ്, കമുക് തൈകളും നശിപ്പിച്ചു. മുന്‍പും ആറളം വന്യജീവി സങ്കേതത്തില്‍ നിന്നിറങ്ങിയ കാട്ടാനകള്‍ ഫാമിലെ നഴ്‌സറിയില്‍ വ്യാപക നാശം വരുത്തിയിരുന്നു. കഴിഞ്ഞ രാത്രിയില്‍ നഴ്‌സറിയുടെ ഗേറ്റ് തകര്‍ത്തെത്തിയ മൂന്നോളം ആനകളാണ് ഇവിടെ വിളയാടിയത്. നൂറോളം തെങ്ങിന്‍ തൈകളും ഇരുന്നൂറോളം കമുകിന്‍ തൈകളും ആനകള്‍ നശിപ്പിച്ചു. ഇതിനു സമീപത്തുള്ള പോളി ഹൗസും കാട്ടാനകള്‍ നശിപ്പിച്ചിട്ടുണ്ട്. ഇവിടേയ്ക്ക് വെള്ളമെത്തിക്കുന്ന പൈപ്പും കേടുവരുത്തി. ആറളം വന്യജീവി സങ്കേതത്തില്‍നിന്ന് ബാവലി പുഴ കടന്ന് നാട്ടിലിറങ്ങിയ ആനകള്‍ കഴിഞ്ഞ ദിവസങ്ങളില്‍ പാലപ്പുഴ, പെരുമ്പുന്ന, മുഴക്കുന്ന് പഞ്ചായത്തിലെ വിവിധ പ്രദേശങ്ങള്‍ എന്നിവിടങ്ങളില്‍ വ്യാപക നാശം വരുത്തുകയും രണ്ടുപേരെ ആക്രമിച്ച് പരുക്കേല്‍പ്പിക്കുകയും ചെയ്തിരുന്നു. ജനവാസ കേന്ദ്രങ്ങളില്‍ ദിവസങ്ങളോളം ഭീതിപരത്തിയ ആനകളെ മണിക്കൂറുകളുടെ ശ്രമഫലമായാണ് കാടുകയറ്റി വിട്ടത്. ഈ ആനകളാണ് ഇപ്പോള്‍ ആറളം ഫാമില്‍ നാശം വിതച്ചതെന്നാണ് കരുതുന്നത്.