മുംബൈ: ഇന്ത്യന്‍ പ്രീമിയര്‍ ലീഗ് ഫൈനല്‍ ലക്ഷ്യമിട്ട് മുന്‍ ചാംപ്യന്‍മാരായ സണ്‍റൈസേഴ്‌സ് ഹൈദരാബാദും കൊല്‍ക്കത്ത നൈറ്റ് റൈഡേഴ്‌സും ഇന്ന് നേര്‍ക്കുനേര്‍ വരും. രണ്ടാം ക്വാളിഫയര്‍ പോരാട്ടത്തിലാണ് ഇരു സംഘവും പോരിനൊരുങ്ങുന്നത്. ഒന്നാം ക്വാളിഫയര്‍ പോരാട്ടത്തില്‍ ചെന്നൈ സൂപ്പര്‍ കിങ്‌സിനോട് പൊരുതി തോറ്റാണ് ഹൈദരാബാദ് വരുന്നതെങ്കില്‍ എലിമിനേറ്റര്‍ മത്സരത്തില്‍ രാജസ്ഥാന്‍ റോയല്‍സിന്റെ വെല്ലുവിളി അതിജീവിച്ചാണ് കൊല്‍ക്കത്ത ആയുസ് നീട്ടിയത്.
ബാറ്റ് കൊണ്ട് മികച്ച പ്രകടനം പുറത്തെടുത്ത് മുന്നില്‍ നിന്ന് നയിക്കുന്ന രണ്ട് ക്യാപ്റ്റന്‍മാരുടെ കീഴിലാണ് ഹൈദരാബാദും കൊല്‍ക്കത്തയും മത്സരിക്കുന്നത്. മുന്നില്‍ വലിയ ലക്ഷ്യമുള്ളതിനാല്‍ ഇരു ടീമും അവസാനം വരെ പൊരുതും. ടി20യുടെ മുഴുവന്‍ ആവേശവും ഇന്നത്തെ പോരാട്ടത്തില്‍ കാണാം. വിജയിക്കുന്ന ടീം ചെന്നൈ സൂപ്പര്‍ കിങ്‌സുമായി ഫൈനലില്‍ ഏറ്റുമുട്ടാന്‍ യോഗ്യത നേടും. അവസാന നിമിഷം ടീമിന്റെ നായക സ്ഥാനമേറ്റെടുക്കേണ്ടി വന്നവരാണ് ഹൈദരാബാദ് നായകന്‍ കെയ്ന്‍ വില്ല്യംസനും കൊല്‍ക്കത്ത നായകന്‍ ദിനേഷ് കാര്‍ത്തികും. മികച്ച നായക മികവിനാല്‍ ശ്രദ്ധേയ വിജയങ്ങള്‍ നേടിയാണ് ഇരു ടീമുകളുടേയും വരവ് എന്നതിനാല്‍ തന്ത്രങ്ങളുടെ മാറ്റുരയ്ക്കലായും ഇന്നത്തെ മത്സരത്തെ കാണാം.
ഇരു ടീമുകളും ബാറ്റിങിലും ബൗളിങിലും സന്തുലിതത്വം പുലര്‍ത്തുന്നു. കെയ്ന്‍ വില്ല്യംസന്‍, ശിഖര്‍ ധവാന്‍, യൂസുഫ് പത്താന്‍ എന്നിവരടങ്ങുന്ന ബാറ്റിങ് നിര ഫോമിലാണ്. ഭുവനേശ്വര്‍ കുമാര്‍, റാഷിദ് ഖാന്‍, സന്ദീപ് ശര്‍മ എന്നിവരടങ്ങിയ ബൗളിങ് നിരയും ഹൈദരാബാദിന്റെ മുന്നേറ്റത്തില്‍ നിര്‍ണയാക സാന്നിധ്യമാണ്. മറുഭാഗത്ത് കാര്‍ത്തിക്, ഉത്തപ്പ, ക്രിസ് ലിന്‍, സുനില്‍ നരെയ്ന്‍, ആന്ദ്രെ റസ്സല്‍ തുടങ്ങിയവരുള്‍പ്പെട്ട ബാറ്റിങ് നിര എതിരാളിക്ക് തലവേദന സമ്മാനിക്കാന്‍ പര്യാപ്തം. പിയൂഷ് ചൗള, നരെയ്ന്‍, കുല്‍ദീപ് യാദവ് എന്നിവരടങ്ങിയ സ്പിന്‍ സഖ്യത്തിന്റെ മികവും കൊല്‍ക്കത്തയെ അപകടകാരികളാക്കുന്നു.