ലഖ്‌നോ:  യാതൊരു മുന്നറിയിപ്പുമില്ലാതെ 80 മുസ്്‌ലിം കുടുംബങ്ങളെ തെരുവിലേക്ക് ഇറക്കി വിട്ട് യോഗി ആദിത്യനാഥ് സര്‍ക്കാര്‍. സംഭാല്‍ ജില്ലയിലെ ബഹജോയി മേഖലയിലാണു സംഭവം നടന്നത്. കഴിഞ്ഞ 50 വര്‍ഷത്തോളമായി താമസിക്കുന്ന വീടുകളില്‍ നിന്നാണ് ഇവര്‍ തങ്ങളെ ഇറക്കിവിട്ടതെന്നാണ് കുടുംബാംഗങ്ങള്‍ പറയുന്നത്. വീടുകളില്‍ നിന്ന് ഇറക്കി വിടുന്നതിനു മുമ്പ് നോട്ടിസൊന്നും തങ്ങള്‍ക്ക് നല്‍കിയിരുന്നില്ലെന്നും കുടുംബാംഗങ്ങള്‍ പറയുന്നു. ഗ്ലാസ് ഫാക്ടറിയുടെ ഭൂമിയിലാണ് വീടുകള്‍ നിര്‍മിച്ചിരിക്കുന്നതെന്ന് ആരോപിച്ചായിരുന്നു നടപടി.

 ഉച്ചക്ക് 1.15 ഓടെ സര്‍ക്കാര്‍ ഉദ്യോഗസ്ഥര്‍ വന്നു വീടുകള്‍ സീല്‍ ചെയ്യുകയായിരുന്നുവെന്നാണ് ഗ്രാമീണര്‍ പറയുന്നത്. നോട്ടിസ് പോലുമില്ലാതെ തങ്ങളെ വീടുകളില്‍ നിന്ന് ഇറക്കിവിടുന്നതില്‍ ഗ്രാമീണര്‍ പ്രതിഷേധിച്ചെങ്കിലും ഫലമൊന്നുമുണ്ടായില്ല. വൈദ്യുതി ബന്ധവും കുടിവെള്ളത്തിന്റെകണക്ഷനും വിച്ഛേദിക്കുകയും ചെയ്തു. ഇത് വലിയ പ്രതിസന്ധിക്കു കാരണമായെന്നും ഗ്രാമീണവാസികള്‍ പറഞ്ഞു.

വീടുകളില്‍ നിന്നിറക്കിവിട്ട ഇവര്‍ യുപിസര്‍ക്കാരിനെ നീതിക്കായി സമീപിച്ചെങ്കിലും ഫലമുണ്ടായില്ല. തങ്ങളുടെ മനുഷ്യാവകാശങ്ങള്‍ പരിഗണിക്കണമെന്നായിരുന്നു ഇവരുടെ ആവശ്യം. എന്നാല്‍ ഇത് അംഗീകരിക്കാന്‍ സംസ്ഥാന സര്‍ക്കാര്‍ ഉദ്യോഗസ്ഥര്‍ തയാറായില്ല. വീടുകളില്‍ നിന്നിറക്കിവിട്ട ഗ്രാമീണര്‍ കടുത്ത പ്രതിസന്ധിയാണ് അഭിമുഖീകരിക്കുന്നത്. തൊഴിലുള്‍പ്പെട ഇവരുടെ എല്ലാ അവകാശങ്ങളും നിഷേധിക്കപ്പെട്ടുവെന്നും അദ്ദേഹം പറഞ്ഞു.