റിയാദ്: നിപാ വൈറസ് കണ്ടെത്തിയതിനെ തുടര്‍ന്ന് കേരളത്തിലെ നാല് ജില്ലകളിലേക്ക് സഊദി തങ്ങളുടെ പൗരന്മാര്‍ക്ക് വിലക്കേര്‍പ്പെടുത്തി. സഊദിയുടെ ന്യൂഡല്‍ഹി എംബസിയാണ് തങ്ങളുടെ പൗരന്മാര്‍ക്ക് മുന്നറിയിപ്പ് നല്‍കിയത്. നിപാ വൈറസ് കേരളത്തില്‍ ആദ്യമായി റിപ്പോര്‍ട്ട് ചെയ്യപ്പെട്ട കോഴിക്കോട്, മലപ്പുറം, വയനാട്, കണ്ണൂര്‍ ജില്ലകളില്‍ സന്ദര്‍ശനം നടത്തരുതെന്നാണ് എംബസിയുടെ നിര്‍ദേശം. ആരോഗ്യ പരിപാലനത്തിനായും ടൂറിസത്തിനായും സഊദികള്‍ സ്ഥിരമായി വരുന്ന സ്ഥലങ്ങളാണ് ഈ ജില്ലകള്‍. കഴിഞ്ഞ ദിവസം യു.എ.എയും ബഹ്‌റൈനും തങ്ങളുടെ പൗരന്മാര്‍ക്ക് ജാഗ്രതാ നിര്‍ദേശം നല്‍കിയിരുന്നു.