മലപ്പുറം: പി.കെ കുഞ്ഞാലിക്കുട്ടിയുടെ തെരഞ്ഞെടുപ്പ് പ്രചാരണത്തിനായി കെ.എം മാണി ഇന്ന് മലപ്പുറത്തെത്തും. കേരളാ കോണ്‍ഗ്രസ് സംഘടിപ്പിക്കുന്ന കണ്‍വന്‍ഷനില്‍ പങ്കെടുക്കുവാനാണ് മാണി എത്തുന്നതെങ്കിലും ഇത് മുന്നണിയിലേക്കുള്ള തിരിച്ചുവരവിന് വഴിയൊരുക്കുമെന്ന പ്രതീക്ഷയിലാണ് യു.ഡി.എഫ്. കേരളാ കോണ്‍ഗ്രസ് യു.ഡി.എഫിലേക്ക് മടങ്ങിവരണമെന്ന് കോണ്‍ഗ്രസ് നേതാക്കളായ ഉമ്മന്‍ചാണ്ടിയും രമേശ് ചെന്നിത്തലയും ആവശ്യപ്പെട്ടിരുന്നു.

യു.ഡി.എഫിലേക്കുള്ള മാണിയുടെ തിരിച്ചുവരവിന് കോണ്‍ഗ്രസ് നേതൃത്വം തന്നെയാണ് മുസ്‌ലിംലീഗിനെയും കുഞ്ഞാലിക്കുട്ടിയെയും മുന്നില്‍ നിര്‍ത്തി നീക്കം സജീവമാക്കിയത്. ഇതിന്റെ ഭാഗമായാണ് ലീഗ് ജന. സെക്രട്ടറി കെ.പി.എ മജീദ് ഉപതെരഞ്ഞെടുപ്പില്‍ സഹായം അഭ്യര്‍ഥിച്ച് മാണിക്ക് കത്തയച്ചതും മാണി അനുകൂലമായി പ്രതികരിച്ചതും.
മുന്‍കാലങ്ങളിലും കേരളാ കോണ്‍ഗ്രസും കോണ്‍ഗ്രസും തമ്മില്‍ പിണക്കമുണ്ടായപ്പോഴെല്ലാം മധ്യസ്ഥത വഹിച്ചതും ഐക്യശ്രമങ്ങള്‍ക്ക് മുന്നില്‍ നിന്നതും ലീഗും കുഞ്ഞാലിക്കുട്ടിയുമാണ്. ഈ സാഹചര്യത്തില്‍ കുഞ്ഞാലിക്കുട്ടിയുടെ തെരഞ്ഞെടുപ്പ് പ്രചാരണത്തിനായി മാണിയെത്തുന്നത് ശുഭസൂചനയാണെന്നാണ് യു.ഡി.എഫ് വിലയിരുത്തുന്നത്. മാണി പങ്കടുക്കുന്ന മലപ്പുറത്തെ പരിപാടിയില്‍ പി.കെ കുഞ്ഞാലിക്കുട്ടി ഉള്‍പ്പെടെയുള്ള ലീഗ് നേതാക്കള്‍ പങ്കെടുക്കുന്നുണ്ട്.

കേരള കോണ്‍ഗ്രസിന്റെ മുന്‍നിര നേതാക്കളുടെ സാന്നിധ്യവും വരും ദിവസങ്ങളില്‍ മലപ്പുറത്തുണ്ടാവും. ഇന്ന് വൈകിട്ട് മൂന്നിന് മലപ്പുറം ടൗണ്‍ഹാളിലാണ് കണ്‍വന്‍ഷന്‍. പാര്‍ട്ടി ചെയര്‍മാന്‍ കെ.എം മാണി ഉദ്ഘാടനം ചെയ്യും. പി.ജെ ജോസഫ് മുഖ്യ പ്രഭാഷണം നടത്തും. പാര്‍ട്ടിയുടെ മുഴുവന്‍ എം.എല്‍.എമാരും എം.പിമാരും സംസ്ഥാന നേതാക്കളും കണ്‍വന്‍ഷനില്‍ പങ്കെടുക്കുന്നുണ്ട്. യു.ഡി.എഫില്‍ നിന്നു പിരിഞ്ഞ ശേഷം ആദ്യമായാണ് മാണി ഇത്തരത്തില്‍ ഒരു പരിപാടിയില്‍ പങ്കെടുക്കുന്നത്.