ഫറോക്ക്: മുഖ്യമന്ത്രിക്കയച്ച കത്തിനു മറുപടിയായി ലഭിച്ച അഭിനന്ദന കത്തിന്റെ അഭിമാനത്തിലും ആഹ്ലാദത്തിലും ഫാറൂഖ് കോളജ് എ.എല്‍.പി സ്‌കൂളിലെ വിദ്യാര്‍ഥികളും അധ്യാപകരും. കഴിഞ്ഞ പരിസ്ഥിതി ദിനത്തിലാണ് സ്‌കൂളിലെ 300ഓളം വിദ്യാര്‍ഥികള്‍ ഒപ്പിട്ട കത്ത് മുഖ്യമന്ത്രി പിണറായി വിജയന് അയച്ചത്. കത്തിലെ ആവശ്യങ്ങള്‍ പരിഗണിക്കാമെന്ന് അറിയിച്ചും വിദ്യാര്‍ഥികളെ അഭിനന്ദിച്ചുമുള്ള മുഖ്യമന്ത്രിയുടെ കത്തെത്തിയതു ബുധനാഴ്ചയാണ്.
പരിസ്ഥിതിക്കു ഹാനികരമല്ലാത്ത വിധത്തിലും മലകള്‍ക്കും പുഴകള്‍ക്കും വയലുകള്‍ക്കും നാശംവരുത്താതെയുമുള്ള വികസന പ്രവര്‍ത്തനങ്ങള്‍ നടപ്പാക്കണമെന്നാണു കുട്ടികള്‍ കത്തിലൂടെ ആവശ്യപ്പെട്ടത്. ഇതിനുള്ള മറുപടിയില്‍, വിദ്യാര്‍ഥികളുടെ വിലപ്പെട്ട അഭിപ്രായങ്ങള്‍ പരിഗണിക്കാമെന്ന് അറിയിച്ച മുഖ്യമന്ത്രി പേരെടുത്തു പറഞ്ഞു വിദ്യാര്‍ഥികളെ അഭിനന്ദിക്കുകയും ചെയ്തു.
കത്ത് ഇന്നു ചേരുന്ന അസംബ്ലിയില്‍ വായിച്ച ശേഷം സ്‌കൂളില്‍ ചില്ലിട്ടുസൂക്ഷിക്കുമെന്നു പ്രധാനാധ്യാപകന്‍ കെ.എം മുഹമ്മദ്കുട്ടി അറിയിച്ചു.