കൊച്ചി: മതസ്പര്‍ധ വളര്‍ത്തുന്ന അഭിമുഖം നടത്തിയെന്നാരോപിച്ച് രജിസ്റ്റര്‍ ചെയ്ത കേസിലെ തുടര്‍ നടപടികള്‍ ക്രൈംബ്രാഞ്ച് വൈകിപ്പിക്കുന്നെന്നാരോപിച്ച് ടി.പി സെന്‍കുമാര്‍ നല്‍കിയ ഹരജിയില്‍ ഹൈക്കോടതി സംസ്ഥാന സര്‍ക്കാരിന്റെ വിശദീകരണം തേടി. കേരള അഡ്മിനിസ്‌ട്രേറ്റീവ് ട്രൈബ്യൂണലിലേക്കുള്ള(കെ.എ.ടി)തന്റെ നിയമനം വൈകിപ്പിക്കാനാണ് സര്‍ക്കാര്‍ ശ്രമിക്കുന്നെന്നും അന്വേഷണം സമയബന്ധിതമായി അവസാനിപ്പിക്കാന്‍ നടപടി വേണമെന്നും ഹരജിയില്‍ ആവശ്യപ്പെട്ടിട്ടുണ്ട്.
മുന്‍ ഡി.ജി.പിയായ സെന്‍കുമാറിനെ കെ.എ.ടി അംഗമായി നിയമിക്കുന്നതിന് ചീഫ് ജസ്റ്റിസ് ഉള്‍പ്പെട്ട സമിതി ശുപാര്‍ശ ചെയ്തിരുന്നു. എന്നാല്‍ സംസ്ഥാന സര്‍ക്കാരിന്റെ പ്രതികാര നടപടി മൂലമാണ് തനിക്ക് ഇനിയും നിയമനം കിട്ടാത്തതെന്നും ഹരജിയില്‍ പറയുന്നു. ഒരു വെബ്‌സൈറ്റിനു നല്‍കിയ അഭിമുഖത്തില്‍ മതസ്പര്‍ധ വളര്‍ത്തുന്ന പരാമര്‍ശങ്ങളുണ്ടെന്ന് പോസ്റ്റലില്‍ ലഭിച്ച പരാതിയില്‍ വേണ്ടത്ര പരിശോധന നടത്താതെയാണ് ധൃതിയില്‍ കേസ് എടുത്തതെന്നും ഹരജിയില്‍ കുറ്റപ്പെടുത്തുന്നു. തനിക്കെതിരായ കേസില്‍ അന്തിമ റിപ്പോര്‍ട്ട് നല്‍കാതെ വൈകിപ്പിക്കുകയാണെന്നും ഹരജിയില്‍ പറയുന്നു.