കുട്ടനാട്: അഞ്ചാം കേരള നേവല്‍ ബറ്റാലിയന്‍ എന്‍.സി.സി കേഡറ്റുകളുടെ പരിശീലനത്തിനായുള്ള ഓഫീസ് കുട്ടനാട്ടില്‍ ആരംഭിക്കുമെന്ന് തോമസ് ചാണ്ടി എം.എല്‍.എ. എന്‍.സി.സി ഓഫീസിനു പുറമെ 300 കേഡറ്റുകള്‍ക്കും 25 നേവി പരിശീലകര്‍ക്കും താമസ സംവിധാനം ഉള്‍പ്പെടെയുള്ള ക്യാമ്പാണ് ആരംഭിക്കുന്നത്.
ഏഴ് വെയ്‌ലര്‍ ബോട്ട്, സെയിലിംഗ് ബോട്ട്, രണ്ട് റെസ്‌ക്യു ബോട്ട് തുടങ്ങിയവയും ക്യാമ്പിനോടനുബന്ധിച്ചുണ്ടാവും. വെള്ളത്തില്‍ വീണുണ്ടാകുന്ന അപകടങ്ങള്‍ക്ക് നേവിയുടെ സഹായം ഈ ക്യാമ്പില്‍നിന്നും അടിയന്തിരമായി ലഭ്യമാക്കുമെന്നും അദ്ദേഹം അറിയിച്ചു. ഇന്ത്യയിലെമ്പാടുമുള്ള എന്‍.സി.സി കേഡറ്റുകള്‍ക്ക് സാഹസിക പരിശീലനങ്ങളായ നീന്തല്‍, കനോയിംഗ്, കയാക്കിംഗ്, പാരാസെയിലിംഗ്, സെയിലിംഗ് എക്‌സ്‌പെന്‍ഡിഷന്‍, സ്‌കൂബാ ഡൈവിംഗ് തുടങ്ങിയ സജീകരണങ്ങളും ക്യാമ്പിനോടനുബന്ധിച്ചുണ്ടാവും.
കേന്ദ്ര സംസ്ഥാന സര്‍ക്കാരുകളുടെ സാമ്പത്തിക സഹായത്തോടെയാണ് പദ്ധതി നടപ്പിലാക്കുന്നത്. ഇതുസംബന്ധിച്ച് തോമസ് ചാണ്ടി എം.എല്‍.എയും എന്‍.സി.സി ഡെപ്യൂട്ടി ഡയറക്ടര്‍ ജനറല്‍ ബ്രിഗേഡിയര്‍ സനല്‍കുമാറും ഉന്നത എന്‍.സി.സി ഉദ്യോഗസ്ഥരുമായും ചര്‍ച്ച നടത്തി. ഇതിനായി വെളിയനാട് വില്ലേജിലെ റവന്യൂഭൂമി എന്‍.സി.സിക്ക് വിട്ടുകൊടുക്കുന്നതിനാവശ്യമായ നടപടികള്‍ സ്വീകരിക്കുമെന്നും അദ്ദേഹം അറിയിച്ചു.