ഗുര്‍ഗാവോണ്‍: ഗര്‍ഭിണിയായ യുവതിയെ ഹരിയാനയില്‍ കൂട്ടബലാത്സംഗം ചെയ്തു. 23 കാരിയായ യുവതി ആറു മാസം ഗര്‍ഭിണിയാണ്. യുവതി സഞ്ചരിച്ചിരുന്ന ഓട്ടോയുടെ ഡ്രൈവറും രണ്ടു പേരും ചേര്‍ന്നാണ് ബലാത്സംഗം ചെയ്തതെന്ന് യുവതി പൊലിസില്‍ പറഞ്ഞു.

ഹരിയാനയിലെ മനേശറിലാണ് സംഭവം. യുവതിയുടെ ഭര്‍ത്താവാണ് പരാതി നല്‍കിയത്. ഇരുവരും ബിഹാര്‍ സ്വദേശികളാണ്. സംഭവം നടക്കുന്നത് മെയ് 21നാണ്. യുവതിയും ഭര്‍ത്താവും ചെക്ക്അപ്പിനായി ഡോക്ടറുടെ അടുത്ത് പോയതായിരുന്നു. തിരിച്ചുവരുമ്പോള്‍ യുവതിക്ക് ബൈക്കില്‍ സഞ്ചരിക്കുമ്പോള്‍ ദേഹസ്വാസ്ഥ്യമുണ്ടാവുമെന്ന് പറഞ്ഞപ്പോള്‍ ഷെയര്‍ ഓട്ടോയില്‍ ഭര്‍ത്താവ് യുവതിയെ കയറ്റുകയായിരുന്നു. ഭര്‍ത്താവ് യുവതിയെ വീടിനടുത്ത് കാത്തുനിന്നെങ്കിലും യുവതി വളരെ വൈകിയാണ് എത്തിയത്.

ഓട്ടോയില്‍ വച്ച് ദാഹം തോന്നിയപ്പോള്‍ ഡ്രൈവര്‍ തനിക്ക് വെള്ളം നല്‍കിയെന്നും അത് കുടിച്ച് താന്‍ ബോധരഹിതയായപ്പോഴാണ് തന്നെ ബലാത്സംഗം ചെയ്തതെന്നും യുവതി പറഞ്ഞു.

യുവതിയുടെ പരാതിയുടെ അടിസ്ഥാനത്തില്‍ പോലിസ് കേസ് രജിസ്റ്റര്‍ ചെയ്തു അന്വേഷണം തുടങ്ങിയതായി പോലിസ് അറിയിച്ചു.