അബൂദബി വ്യോമയാന മേഖലയുടെ ഭാവി ചര്‍ച്ച ചെയ്യുന്ന എയര്‍ എക്‌സ്‌പോ അബൂദബി നവംബര്‍ 19 മുതല്‍ 21 വരെ നാഷനല്‍ എക്‌സിബിഷന്‍ സെന്ററില്‍ (അഡ്‌നെക്) നടക്കും. വ്യോമയാന മേഖലയില്‍ സ്ത്രീകള്‍ക്കുള്ള അവസരങ്ങളും വെല്ലുവിളികളും ചര്‍ച്ച ചെയ്യുന്നതിനുള്ള ദ് വിമന്‍ ഇന്‍ ഏവിയേഷന്‍ മിഡില്‍ ഈസ്റ്റ് കോണ്‍ഫറന്‍സ്, വരും ദശകത്തില്‍ യുഎഇ വ്യോമയാന മേഖലയുടെ വളര്‍ച്ച അഭിസംബോധന ചെയ്യുന്ന മിഡില്‍ ഈസ്റ്റ് ഏവിയേഷന്‍ കരിയര്‍ സോണ്‍ തുടങ്ങി ഒട്ടേറെ പുതിയ സെഷനുകളാകും എക്‌സ്‌പോയുടെ പ്രധാന ആകര്‍ഷണങ്ങള്‍. 20,000ത്തിലേറെ പ്രഫഷനലുകളും, ഇതിനുപുറമെ 40ലേറെ ഫ്‌ലൈറ്റ് ട്രെയിനിങ് സ്‌കൂളുകളും പരിപാടിയില്‍ പങ്കെടുക്കും. അതേസമയം ഇത് വ്യോമയാന മേഖലയിലെ അവസരങ്ങള്‍ മനസ്സിലാക്കാനും വെല്ലുവിളികള്‍ പരിഹരിക്കാനുമുള്ള മികച്ച അവസരമാണ്. ഗ്രൗണ്ട് ഓപ്പറേഷനുകള്‍ മുതല്‍ വ്യോമയാന മേഖലയുമായി ബന്ധപ്പെട്ട സമസ്ത കാര്യങ്ങളും ചര്‍ച്ച ചെയ്യാവുന്ന വേദി ഈ രംഗത്തുള്ളവര്‍ക്ക് ഏറെ മുതല്‍ക്കൂട്ടാകും.

എയര്‍ എക്‌സ്‌പോ അബൂദബിയില്‍ സിവില്‍ ഏവിയേഷന്‍, എയ്‌റോസ്‌പേസ്, വ്യോമയാന സുരക്ഷ, പരിശീലനം, വിമാന അറ്റകുറ്റപ്പണി തുടങ്ങിയ മേഖലകളില്‍ വമ്പന്‍ കരാറുകള്‍ ഒപ്പുവയ്ക്കുമെന്നാണ് കരുതുന്നത്. ഇലക്ട്രിക് എയര്‍ക്രാഫ്റ്റ്, അര്‍ബന്‍ എയര്‍ മൊബിലിറ്റി, ഓട്ടോണമസ് ഫ്‌ലൈയിങ് സിസ്റ്റം തുടങ്ങി വിപ്ലവകരമായ വിഷയങ്ങള്‍ ഉള്‍ക്കൊള്ളുന്ന എയ്‌റോസ്‌പേസ് സാങ്കേതികവിദ്യ, മൊബിലിറ്റി സൊല്യൂഷനുകള്‍, നിര്‍മിത ബുദ്ധി എന്നി വിഷയങ്ങളിലെ സമീപകാല മുന്നേറ്റങ്ങളെക്കുറിച്ച് വിദഗ്ധര്‍ നയിക്കുന്ന സെമിനാറുകളും ശില്‍പശാലകളും എക്‌സ്‌പോയിലുണ്ടാകും.  

അബൂദബി സാംസ്‌കാരിക ടൂറിസം വകുപ്പ്, ഇത്തിഹാദ് എയര്‍വേയ്‌സ്, അഡ്‌നോക് ഏവിയേഷന്‍ സര്‍വീസസ്, ഫാല്‍ക്കണ്‍ ഏവിയേഷന്‍ സര്‍വീസസ്, സനദ് ഗ്രൂപ്പ് എന്നിവയുടെ സഹകരണത്തോടെയാണ് എക്‌സ്‌പോ ഒരുക്കിയിരിക്കുന്നത്.

കൂടൂതൽ ​ഗൾഫ് വാർത്തകളറിയാൻ ഈ ഗ്രൂപ്പിൽ ജോയിൻ ചെയ്യുക

Get ready for Air Expo Abu Dhabi, a premier aviation event in the Middle East, from November 19-21, 2024. Witness stunning air displays, explore cutting-edge aerospace technology and connect with industry professionals.