നാദാപുരം: ഗവ. ആശുപത്രിയിലെ രോഗികളെയും കൂട്ടിരിപ്പുകാരെയും  സഹായിക്കാന്‍ ആശുപത്രി കേന്ദ്രീകരിച്ച് പ്രവര്‍ത്തിക്കുന്ന എ. കണാരന്‍ ചാരിറ്റബിള്‍ ട്രസ്റ്റിന്റെ  ധനശേഖരണാര്‍ഥം സംഘടിപ്പിച്ച വോളിബാള്‍ മേള നാടിന്റെ ഒരുമയുടെ ഒത്തുചേരലായി. സി.പി.എം, ലീഗ്, കോണ്‍ഗ്രസ് നേതാക്കള്‍ വികസന കാര്യത്തിലും മേഖലയിലെ ശാശ്വത സമാധാനം ഉറപ്പു വരുത്തുന്നതിലും പ്രതിജ്ഞാ ബദ്ധമായി പ്രവര്‍ത്തിക്കുമെന്ന് ഉദ്ഘാടന പരിപാടിയില്‍ പറഞ്ഞു.
ലീഗ് നേതാക്കളായ സൂപ്പി നരിക്കാട്ടേരി, അഹ്മദ് പുന്നക്കല്‍, മണ്ടോടി ബഷീര്‍, സി.പി അബ്ദുല്‍ സലാം, സി.പി.എം നേതാക്കളായ പി.പി ചാത്തു, വി.പി കുഞ്ഞികൃഷ്ണന്‍, സി.എച്ച് മോഹനന്‍, സി.എച്ച് ബാലകൃഷ്ണന്‍, കോണ്‍ഗ്രസ് നേതാക്കളായ അഡ്വ. എ. സജീവന്‍, ഇ.കെ വിജയന്‍ എം.എല്‍.എ പങ്കെടുത്തു.
ഇന്നലെ നടന്ന വനിതകള്‍ തമ്മിലുള്ള  ഉദ്ഘാടന മത്സരത്തില്‍ ചങ്ങനാശ്ശേരി അസംപ്ഷന്‍ കോളജിനെ നേരിട്ടുള്ള മൂന്നു സെറ്റുകള്‍ക്ക് കണ്ണൂര്‍ കൃഷ്ണമേനോന്‍ കോളജ് ടീം പരാജയപ്പെടുത്തി. പുരുഷന്‍മാരുടെ മത്സരത്തില്‍ വെല്‍ക്കം കോക്കനട്ട് ഓയില്‍ കുറ്റ്യാടിയെ  ഒന്നിനെതിരേ മൂന്നു സെറ്റുകള്‍ക്ക് മസാഫി ഹോളിഡേയ്‌സ് നാദാപുരം പരാജയപ്പെടുത്തി.