പാലക്കാട്: ഗ്രാമസഭകളുടെ തീരുമാനത്തിന് പുല്ലുവില കല്‍പ്പിച്ച് കേരള-തമിഴ്‌നാട് അതിര്‍ത്തിപ്രദേശമായ വടകരപ്പതി പഞ്ചായത്തില്‍ സ്വകാര്യകമ്പനികളുടെ കാറ്റാടിയന്ത്രങ്ങള്‍ നിര്‍മാണം സജീവം.
യാതൊരു നിയമങ്ങളും പാലിക്കാതെയാണ് പ്രകൃതിക്കും മനുഷ്യനും ദുരിതംവിതച്ച് കാറ്റാടി യന്ത്രങ്ങള്‍ നിര്‍മിക്കാന്‍ ഒരുങ്ങുന്നതെന്ന് നാട്ടുകാര്‍ആരോപിക്കുന്നു. ജനവാസ മേഖലയില്‍നിന്ന് നാല് കിലോമീറ്ററെങ്കിലും അകലത്തില്‍ മാത്രമേ കാറ്റാടി യന്ത്രങ്ങള്‍ സ്ഥാപിക്കാന്‍ പാടുള്ളൂ എന്ന നിയമം നിലനില്‍ക്കെയാണ് ഇവിടെ ജനവാസമേഖലയില്‍നിന്ന് അരകിലോമീറ്റര്‍ പോലും അകലം പാലിക്കാതെ യന്ത്രങ്ങള്‍ സ്ഥാപിച്ചിക്കാന്‍ ഒരുങ്ങുന്നത്. കാറ്റാടിയന്ത്രങ്ങള്‍ തകര്‍ന്നു വീണാലുണ്ടാകുന്ന അപകടസാധ്യത പാടെ തള്ളിക്കളഞ്ഞാണ് പ്രദേശത്ത് വീണ്ടും കാറ്റാടി യന്ത്രങ്ങള്‍ സ്ഥാപിക്കാന്‍ സര്‍ക്കാര്‍ അനുമതി കൊടുത്തിരിക്കുന്നത്. ഇത് പ്രദേശവാസികളെ ബുദ്ധിമുട്ടിലാക്കുക മാത്രമല്ല ഇവര്‍ ഒന്നടങ്കം അയല്‍സംസ്ഥാനമായ തമിഴ്‌നാട്ടിലേക്ക് കുടിയേറി പോകുന്നതിനും സാഹചര്യമൊരുക്കും.
വടകരപ്പതി പഞ്ചായത്തിന്റെ കീഴില്‍ ഏകദേശം നാലോളം പ്രദേശങ്ങളിലെ ജനങ്ങളാണ് കാറ്റാടിയന്ത്രം മൂലം ദുരിതമനുഭവിക്കുന്നത്. ഈ പ്രദേശത്തെ ഭൂരിഭാഗം ജനങ്ങളും കാര്‍ഷികമേഖലയും കാലിവളര്‍ത്തലും ഉപജീവനമാര്‍ഗമാക്കിയവരാണ്.
ഇവിടുത്തെ കാറ്റാടിയന്ത്രങ്ങളുടെ നിരന്തരമായ ശബ്ദം കന്നുകാലികളെയും ദോഷകരമായ രീതിയില്‍ ബാധിക്കാനിടയുണ്ട്. കുടിവെള്ളപ്രശ്‌നം രൂക്ഷമായുളള ഈ മേഖലയില്‍ കാറ്റാടിയന്ത്രങ്ങളുടെ വരവ് ഇവിടുത്തെ ജനജീവിതം കൂടുതല്‍ പ്രതിസന്ധിയിലേക്ക് നീങ്ങുന്നതിന് വഴിവയ്ക്കും. ഇതിനെതിരേ വടകരപ്പതി പഞ്ചായത്ത് അഞ്ച് വാര്‍ഡുകളില്‍ഗ്രാമസഭ വിളിച്ചുകൂട്ടുകയും ജില്ലാഭരണകൂടത്തിന് പരാതി നല്‍കുകയും വ്യാപകമായി പ്രതിഷേധം സംഘടിപ്പിക്കുകയും ചെയ്തിരുന്നു. എന്നാല്‍ ഇതുമറികടന്ന് ഇവിടെ കാറ്റാടിയന്ത്രങ്ങള്‍ സ്ഥാപിക്കാന്‍ വന്‍ പൊലിസ് അകമ്പടിയോടെ പ്രദേശത്ത് യന്ത്രസാമഗ്രികള്‍ ഇറക്കിതുടങ്ങിയിട്ടുണ്ട്