ആറ്റിങ്ങല്‍: വിദ്യാര്‍ഥികള്‍ക്ക് കഞ്ചാവ് വില്‍പന നടത്തി വന്ന യുവാവിനെ ആറ്റിങ്ങല്‍ പൊലീസ് പിടികൂടി. കിഴുവിലം പുകയിലത്തോപ്പ് ജയനിവാസില്‍ ജയലാല്‍ (25) ആണ് അറസ്റ്റിലായത്.
ആറ്റിങ്ങല്‍ പോളിടെക്‌നിക് കോളജിലെ വിദ്യാര്‍ഥികള്‍ക്ക് സുലഭമായി കഞ്ചാവ് ലഭിക്കുന്നു എന്ന പരാതിയെ തുടര്‍ന്ന് പൊലിസ് നടത്തിയ പരിശോധനയില്‍ അഞ്ചു വിദ്യാര്‍ഥികളെ പിടികൂടിയിരുന്നു. ഇവരെ ചോദ്യം ചെയ്തപ്പോഴാണ് ജയലാലിനെ കുറിച്ചുള്ള വിവരങ്ങള്‍ ലഭിച്ചത്.
വിദ്യാര്‍ഥികളില്‍ ഒരാളെ ഇയാള്‍ ഏജന്റുമാക്കിയിരുന്നു. പ്രത്യേകം കമ്മിഷനും നല്‍കും. കഞ്ചാവ് ഉപയോഗിച്ച് പിടിയിലായതില്‍ ഈ വിദ്യാര്‍ഥിയും ഉണ്ടായിരുന്നു. ഇയാളെക്കൊണ്ട് ഫോണ്‍ വിളിപ്പിച്ചാണ് ജയലാലിനെ വലയിലാക്കിയത്. പ്രതിയുടെ പക്കല്‍ പത്തു ഗ്രാം വീതമുള്ള പത്തു പൊതി കഞ്ചാവും പിടികൂടി. ചിറയിന്‍കീഴുള്ള ഒരാളാണ് ജയലാലിന് കഞ്ചാവ് എത്തിക്കുന്നതെന്നാണ് വിവരം. മുന്‍പ് കെട്ടിടനിര്‍മാണവുമായി ബന്ധപ്പെട്ട് തട്ടു ജോലിചെയ്തിരുന്ന ഇയാള്‍ ഒരു വര്‍ഷക്കാലമായി വിദ്യാര്‍ഥികള്‍ക്കു കഞ്ചാവ് നല്‍കി വരികയായിരുന്നുവെന്ന് പൊലിസ് പറഞ്ഞു.
പിടിയിലായ വിദ്യാര്‍ഥികളെ വീട്ടുകാര്‍ക്കൊപ്പം വിട്ടയച്ചു. സി.ഐ സുനില്‍കുമാര്‍, എസ്.ഐ ശ്രീജിത്, സി.പി.ഒ മാരായ ഷൈജു, കൃഷ്ണലാല്‍, ജയകുമാര്‍, ബിജു എന്നിവരാണ് ജയലാലിനെ അറസ്റ്റു ചെയ്തത്. കോടതി ഇയാളെ റിമാന്റ് ചെയ്തു.