തൃശൂര്‍: നവോഥാന കാലത്തിന്റെ പോരാട്ടം തുടരുന്നതില്‍ നമുക്ക് വീഴ്ച വന്നതായി പ്രൊഫ. സാറാ ജോസഫ്. ശാസ്ത്ര സാഹിത്യ പരിഷത്ത് ജില്ലാ കമ്മിറ്റി സംഘടിപ്പിച്ച ആര്യ പ്രേംജി അനുസ്മരണം ഉദ്ഘാടനം ചെയ്യുകയായിരുന്നു അവര്‍.
നാല്‍പതുകളിലെ രാഷ്ട്രീയ, സാമൂഹിക കാലാവസ്ഥ ഉണര്‍ത്തിയ സ്വപ്നങ്ങള്‍ യാഥാര്‍ഥ്യമാക്കാനായോ എന്നതാണ് ഇന്നത്തെ ചോദ്യം. പലതും നേടാനായില്ല. അതില്‍ പ്രധാനം സ്ത്രീസുരക്ഷയാണെന്നും സാറാ ജോസഫ് പറഞ്ഞു. മുഖ്യധാരയുടെ ഏഴയലത്തുപോലും വരാന്‍ സ്ത്രീകള്‍ക്ക് സാധ്യമല്ലാതിരുന്ന കാലത്താണ് ശ്രമകരമായ വിധവവാവിഹം നടന്നത്. നവോഥാനകാലത്തിന്റെ പോരാട്ടമായിരുന്നു അത്. ആ കാലം അനേകം ധാരകളിലൂടെയാണ് കടന്നുപോയത്. അത് വളര്‍ന്നതാണ് സ്വാതന്ത്ര്യസമരം.
ദലിത് സമരങ്ങളിലൂടെ, വിവിധ സാമുദായിക സമരങ്ങളിലൂടെ ജാതിമേധാവിത്തത്തിനെതിരായ പോരാട്ടത്തിലൂടെ വളര്‍ന്ന ആ കാലത്തിന്റെ ഏറ്റവും വലിയ നേട്ടമെന്നത് സ്ത്രീശാക്തീകരണമായിരുന്നു.
സ്വാതന്ത്ര്യം ആരും തരേണ്ടതല്ലെന്ന ബോധ്യം അവര്‍ക്കുണ്ടായിരുന്നു. സ്ത്രീ സ്വന്തം കാലില്‍ നില്‍ക്കുന്ന ഒരു കാലത്തെ സൃഷ്ടിക്കാനാണ് അക്കാലത്ത് സ്ത്രീകള്‍ പോരാടിയത്. അതിനു കാരണം ആര്യ പ്രേംജിയെപ്പോലുളളവരുടെ അനുഭവങ്ങളായിരുന്നു. എന്നാല്‍ തന്റെ കാര്യം താന്‍ നിശ്ചയിക്കും എന്നു പറയുന്ന ഒരു സ്ത്രീയെ ഇന്നു കാണാനാവില്ല.
സ്ത്രീശാക്തീകരണം സാധിതമാക്കാനാവാത്തതിനാലാണ് ഒരു വര്‍ഗീയപാര്‍ട്ടിക്ക് സ്ത്രീകളെയും ദലിതരെയും ആക്രമിക്കാന്‍ ശക്തിയുണ്ടാകുന്നത്. മാറ്റങ്ങളല്ല, പരിഷ്‌കാരങ്ങളാണ് നമുക്കുണ്ടായത്. അവകാശത്തിലേക്ക് സ്ത്രീയെ എത്തിക്കാനായില്ല. ആഴങ്ങളില്‍ വേരൂന്നിയ സാംസ്‌കാരികബോധത്തെ മാറ്റാനുമായില്ല. നമ്മുടെ പ്രതിരോധം ദുര്‍ബലമായതിന്റെ ഫലമാണിതെന്നും അവര്‍ പറഞ്ഞു. സ്ത്രീകളും കുട്ടികളും എത്ര സുരക്ഷിതരാണ് എന്നതാണ് നമ്മുടെ മുന്നിലെ പ്രശ്‌നമെന്നും സാറാ ജോസഫ് പറഞ്ഞു.
പി.എസ് ഇക്ബാല്‍ അധ്യക്ഷനായി. നീലന്‍, പാര്‍വതി പവനന്‍, ലില്ലി തോമസ്, കെ.ആര്‍ വിജയ, എം.ജി ജയശ്രീ, എം.തങ്കമണി, പ്രൊഫ. സി.വിമല, ടി.വി വിശ്വംഭരന്‍ എന്നിവര്‍ സംസാരിച്ചു. തുടര്‍ന്ന് നീലന്‍ സംവിധാനം ചെയ്ത ആര്യ പ്രേംജിയെക്കുറിച്ചുള്ള ഡോക്യുമെന്ററി അമ്മ പ്രദര്‍ശിപ്പിച്ചു.