കൊച്ചി: ദലിത് സ്ത്രീകള്‍ക്കെതിരായ അതിക്രമങ്ങള്‍ അന്വേഷിക്കാന്‍ എസ്.ഐ.ടി സംവിധാനം വേണമെന്ന് ആദിവാസി ഗോത്ര മഹാസഭ കോര്‍ഡിനേറ്റര്‍ എം. ഗീതാനന്ദന്‍ വാര്‍ത്താസമ്മേളനത്തില്‍ പറഞ്ഞു.
ജിഷ കേസ് അന്വേഷണം തുടക്കംമുതല്‍ പാളിയെന്ന വിജിലന്‍സ് ഡയരക്ടറുടെ നിരീക്ഷണത്തിന്റെ പശ്ചാത്തലത്തിലാണ് ഇത്തരം ആവശ്യം ഉന്നയിക്കുന്നത്. കൊലപാതകം, ലൈംഗികാതിക്രമം പോലെയുള്ള കുറ്റകൃത്യങ്ങള്‍ അന്വേഷിക്കുന്ന കേരള പൊലിസ് സംവിധാനത്തെക്കുറിച്ച് ഗുരുതരമായ സംശയങ്ങളാണ് ഉയരുന്നത്. കുറ്റവാളികളോടൊപ്പമാണ് പൊലിസ് എന്ന പ്രതീതിയാണ് ജനങ്ങള്‍ക്കുള്ളത്.
ജിഷ കേസില്‍ തുടന്വേഷണം വേണമെന്ന ആവശ്യം പരിഗണിക്കാന്‍ സര്‍ക്കാരും കോടതികളും തയാറാകണം. ജിഷ കേസിന്റെ പുനരന്വേഷണ സാധ്യത സര്‍ക്കാരും ബന്ധപ്പെട്ട കോടതികളും പരിഗണിക്കുക, സ്ത്രീകള്‍, ദലിതര്‍, കുട്ടികള്‍ തുടങ്ങിയവര്‍ക്കെതിരേ നടക്കുന്ന കുറ്റകൃത്യങ്ങളെക്കുറിച്ച് ശാസ്ത്രീയമായ അന്വേഷണം നടത്താനുള്ള പ്രത്യേക അന്വേഷണ സംവിധാനം രൂപീകരിക്കുക തുടങ്ങിയ ആവശ്യങ്ങള്‍ ഉന്നയിച്ച് ഭൂഅധികാര സംരക്ഷണ സമിതി പദയാത്ര സംഘടിപ്പിക്കും.
ഏപ്രില്‍ 29ന് കാസര്‍കോട് ജില്ലയില്‍ ജിഗ്‌നേഷ് മേവാനി ഉദ്ഘാടനം ചെയ്യുന്ന പദയാത്ര മേയ് 31ന് തിരുവനന്തപുരത്ത് എത്തിച്ചേരും. വാര്‍ത്താസമ്മേളനത്തില്‍ ആദിജന മഹാസഭ നേതാവ് സി.ജെ. തങ്കച്ചനും പങ്കെടുത്തു.