മട്ടന്നൂര്‍: സ്വകാര്യബസ് ചെളി തെറിപ്പിച്ചത് ചോദ്യം ചെയ്തതിനെ തുടര്‍ന്ന് റോഡില്‍ കൈയാങ്കളി. സംഭവത്തില്‍ ബൈക്ക് യാത്രികന് പരുക്കേറ്റു.
ഇന്നലെ  വൈകുന്നേരം നാലരയോടെ ചാവശേരി പഴയ പോസ്റ്റ് ഓഫിസ് സ്റ്റോപ്പിലാണ് സംഭവം. വാക്കേറ്റം നടത്തിയ ബൈക്ക് യാത്രികനെ ബസ് ഡ്രൈവര്‍ മര്‍ദിച്ചതാണ് സംഘര്‍ഷാവസ്ഥയ്ക്കിടയാക്കിയത്. മുഖത്ത് പരുക്കേറ്റ പരിയാരത്തെ വി വാഹിദിനെ (60) മട്ടന്നൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു. ഇരിട്ടിയില്‍ നിന്നു കണ്ണൂരിലേക്ക് പോകുകയായിരുന്ന ആഷിക് ബസ് ഡ്രൈവര്‍ മര്‍ദിച്ചുവെന്നാണ് പരാതി. അമിത വേഗതയില്‍ പോകുകയായിരുന്ന ബസ് ചാവശേരി ജുമാ മസ്ജിദിനു സമീപത്തു വച്ച് ബൈക്ക് യാത്രക്കാരുടെ മേല്‍ ചെളി തെറിപ്പിക്കുകയായിരുന്നുവത്രേ. ബസിനെ പിന്തുടര്‍ന്ന ബൈക്ക് യാത്രക്കാര്‍ പഴയ പോസ്റ്റാഫിസ് സ്റ്റോപ്പില്‍ വച്ച് ബസിനു കുറുകെ ബൈക്ക് നിര്‍ത്തി ചോദ്യം ചെയ്തതോടെയാണ്  കൈയാങ്കളി തുടങ്ങിയത്. ഇതോടെ ജനം തടിച്ചുകൂടി. ഇതേത്തുടര്‍ന്ന് അല്‍പനനേരം ഗതാഗതം മുടങ്ങി. മട്ടന്നൂര്‍ പൊലിസെത്തി ബസ് കസ്റ്റഡിയിലെടുത്ത ശേഷമാണ് സ്ഥിതി ശാന്തമായത്.