നാദാപുരം: രണ്ടു വര്‍ഷത്തിലധികമായി വിവാദത്തില്‍ നില്‍ക്കുന്ന നാദാപുരത്തെ മാലിന്യ പ്രശ്‌നം പരിഹാരമാകാതെ തുടരുന്നു. പത്തു വര്‍ഷത്തിലധികമായി പാലോംചാലക്കുന്നില്‍ നല്ല നിലയില്‍ പ്രവര്‍ത്തിച്ചു വന്ന പഞ്ചായത്ത് മാലിന്യ സംസ്‌കരണ പ്ലാന്റിനെതിരേ പരിസരവാസികള്‍ എതിര്‍പ്പുമായി രംഗത്ത് വന്നതോടെയാണ് പ്രശ്‌നത്തിന്റെ തുടക്കം. പരിസരവാസികള്‍ പ്ലാന്റിനെതിരേ സമരവുമായി രംഗത്ത് വന്നപ്പോള്‍ സി.പി.എം പിന്തുണ പ്രഖ്യാപിച്ചതോടെ കോടതിയുടെ അനുകൂല വിധിയുണ്ടായിട്ടും നിയമം നടപ്പിലാക്കാനാവാതെ പഞ്ചായത്ത് പിന്‍മാറുകയായിരുന്നു.
എന്നാല്‍ നാദാപുരം , കല്ലാച്ചി ടൗണുകളിലെ മാലിന്യം നീക്കം ചെയ്യണമെന്നാവശ്യപ്പെട്ട് സി.പിഎമ്മിന്റെയും , യുവജന സംഘടനായ ഡി.വൈ.എഫ്.ഐയുടെയും നേതൃത്വത്തില്‍ നടക്കുന്ന സമരങ്ങളുടെ ആത്മാര്‍ഥതയാണ് ജനങ്ങളില്‍ സംശയം ജനിപ്പിക്കുന്നത്. ഒരേ സമയം പ്ലാന്റ് പ്രവര്‍ത്തനത്തെ എതിര്‍ക്കുകയും മാലിന്യ വിഷയത്തില്‍ പഞ്ചായത്തിനെതിരേ പ്രക്ഷോഭം സംഘടിപ്പിക്കുകയും ചെയ്യുന്ന ഇരട്ട നിലപാടാണ് പ്രതിപക്ഷ കക്ഷികള്‍ പുലര്‍ത്തുന്നത്. ഒടുവില്‍ ഹരിത കേരളം പദ്ധതിയില്‍ ഉള്‍പ്പെടുത്തി ജില്ലാ കലക്ടര്‍ വിളിച്ചു ചേര്‍ത്ത സര്‍വകക്ഷി തീരുമാനവും പ്ലാന്റ് വിഷയത്തില്‍ നിലച്ചിരിക്കുകയാണ്.
പ്ലാന്റിന്റെ രൂപവും പേരും മുഴുവന്‍ മാറ്റി എം.ആര്‍ എഫ് കേന്ദ്രമാക്കാനായിരുന്നു ഏപ്രില്‍ മാസത്തി ല്‍ തയാറാക്കിയ പദ്ധതി. എന്നാല്‍ ഇതിനെതിരെയും പ്രാദേശിക സി.പി.എം നേതൃത്വത്തിലുള്ള കര്‍മസമിതി രംഗത്ത് വന്നതോടെ പ്രവര്‍ത്തനം നടത്താന്‍ കഴിയാതെ നാദാപുരത്തെ മാലിന്യ പ്രശ്‌നം രൂക്ഷമാവുകയാണ്. ടൗണിലെ മാലിന്യങ്ങള്‍ നിറവിന്റെ സഹായത്തോടെ നീക്കം ചെയ്താണ് നേരത്തെ താല്‍ക്കാലിക പരിഹാരം കണ്ടെത്തിയത്. എന്നാല്‍ കാലവര്‍ഷം ആരംഭിച്ചതോടെ ടൗണുകളില്‍ അടിഞ്ഞു കൂടിയ മാലിന്യങ്ങള്‍ ആരോഗ്യ ഭീഷണി ഉയര്‍ത്തുകയാണ്. പ്രശ്‌ന പരിഹാരം കാണാതെയുള്ള രാഷ്ട്രീയ വടംവലിയില്‍ പൊതുജനത്തിന്റെ ആരോഗ്യ സുരക്ഷയാണ് ഭീഷണിയിലാകുന്നത്. അടഞ്ഞു കിടക്കുന്ന മാലിന്യ പ്ലാന്റിലെ നിലവിലെ മാലിന്യങ്ങള്‍ നീക്കാന്‍ 13 ലക്ഷം രൂപ വകയിരുത്തിയിട്ടുണ്ട്.
ഫണ്ടുപയോഗിച്ച് അവിടം നവീകരിച്ചാല്‍ ആശങ്കയില്ലാത്ത വിധം എം.ആര്‍.എഫ് സംവിധാനം ഒരുക്കാന്‍ കഴിയുമെന്ന് പ്രസിഡന്റ് എം.കെ സഫീറ പറഞ്ഞു.