തിരുവമ്പാടി: പാമ്പിഴഞ്ഞപാറയിലെ മലിനമായ പഞ്ചായത്ത് പൊതുകിണര്‍ ശുചീകരിക്കാന്‍ ആരോഗ്യവകുപ്പ് തയാറാകുന്നില്ല. കഴിഞ്ഞമാസം ലഭിച്ച വെള്ളത്തിന്റെ പരിശോധനാ ഫലം പുറത്തുവന്നിട്ടും തുടര്‍നടപടികളില്ലാതെ ആരോഗ്യവകുപ്പ് ഇരുട്ടില്‍ തപ്പുകയാണ്. പരിശോധനാ ഫലം പ്രകാരം വെള്ളത്തിന്റെ പി.എച്ച് മൂല്യം വളരെ കുറവാണ്. ഇതു ശരിപ്പെടുത്താന്‍ നീറ്റുകക്കയും ബ്ലീച്ചിങ് പൗഡറും ചേര്‍ത്ത് ശുദ്ധിയാക്കണമെന്നു പരിശോധന നടത്തിയ മലാപ്പറമ്പിലെ റീജ്യനല്‍ പബ്ലിക് ഹെല്‍ത്ത് ലാബ് നിര്‍ദേശിച്ചിരുന്നു.
എന്നാല്‍ ഇതുസംബന്ധമായ നടപടികള്‍ കൈക്കൊള്ളാന്‍ ആരോഗ്യവകുപ്പ് ഇതുവരെ തയാറായിട്ടില്ല. ബന്ധപ്പെട്ടവര്‍ക്ക് റിപ്പോര്‍ട്ട് സമര്‍പ്പിക്കുക എന്നതൊഴിച്ചാല്‍ തങ്ങള്‍ക്ക് ഇതില്‍ കൂടുതല്‍ ഒന്നും ചെയ്യാന്‍ കഴിയില്ലെന്നാണ് ആരോഗ്യവകുപ്പിന്റെ നിലപാട്. മുപ്പതു വര്‍ഷത്തിലധികം പഴക്കമുള്ള കിണറ്റില്‍ പൊടുന്നനെ വന്ന നിറംമാറ്റമാണ് ആശങ്കയുയര്‍ത്തുന്നത്. മൂന്നുമാസമായി കിണര്‍വെള്ളം മലിനമായതിനാല്‍ പ്രദേശത്തുകാര്‍ കുടിവെള്ളത്തിനു പ്രയാസമനുഭവിക്കുകയാണ്.
അതേസമയം ആരോഗ്യവകുപ്പിന്റെയും പഞ്ചായത്തിന്റെയും നയങ്ങള്‍ക്കെതിരേ പ്രതിഷേധം ഉയര്‍ന്നുകഴിഞ്ഞു. എത്രയും പെട്ടെന്ന് കിണറ്റിലെ മാലിന്യത്തിന്റെ ഉറവിടം കണ്ടെത്തി പ്രശ്‌നം പരിഹരിച്ചില്ലെങ്കില്‍ ശക്തമായ ബഹുജന പ്രക്ഷോഭം സംഘടിപ്പിക്കുമെന്നു മുസ്‌ലിം ലീഗ് കമ്മിറ്റി അറിയിച്ചു. അബ്ദുല്ല ഫൈസി അധ്യക്ഷനായി. മുസ്തഫ കമാല്‍ ഉദ്ഘാടനം ചെയ്തു. അറഫി കാട്ടിപ്പരുത്തി, അബ്ദു ഹാജി വില്ലന്‍ സംസാരിച്ചു. അതേസമയം മാലിന്യനീക്കത്തിനായി നടപടികളെടുക്കുന്നുണ്ടെന്നും പഞ്ചായത്തില്‍ ഫണ്ടില്ലാത്തതാണ് പ്രശ്‌നമെന്നും വാര്‍ഡ് മെംബര്‍ പറഞ്ഞു.