ചക്കരക്കല്‍: കഴിഞ്ഞദിവസം രാത്രിയിലുണ്ടായ കനത്തമഴയില്‍ മതിലിടിഞ്ഞ് രണ്ട് വീടുകള്‍ ഭാഗികമായി തകര്‍ന്നു. കോയ്യോട് പൊതുവാച്ചേരി റോഡിലെ നള്ളക്കണ്ടി പ്രദീപന്റെ വീടും മഞ്ഞാങ്കോട്ട് ഹൗസില്‍ സുമേഷിന്റെ വീടുമാണ് തകര്‍ന്നത്. ബുധനാഴ്ച്ച പുലര്‍ച്ചെ ഒന്നോടെയാണ് സംഭവം. മണ്ണിട്ട് ഉയര്‍ത്തി കെട്ടിപ്പൊക്കിയ സുമേഷിന്റെ 125 മീറ്റര്‍ നീളവും അഞ്ച് മീറ്റര്‍ ഉയരവുമുള്ള മതിലാണിടിഞ്ഞത്. പ്രദീപന്റെ വീടിന്റെ കിണറിന്റെ ആള്‍മറ തകര്‍ന്നു മണ്ണ് വീണ് കിണര്‍ ഭാഗികമായി മൂടപ്പെട്ട നിലയിലാണ്. വീടിന്റെ ഭിത്തിക്കും കേടുപാടുകളുണ്ട്. വന്‍ ശബ്ദത്തോടെയാണ് മതില്‍ വീണത്. രാത്രിയായതിനാല്‍ വന്‍ ദുരന്തം ഒഴിവായി. കൂടാതെ സുമേഷിന്റെ വീടിന്റെ ഐസോണ്‍ മേല്‍ക്കൂര മരം വീണ് തകര്‍ന്നു. ചെമ്പിലോട് വില്ലേജ് ഓഫീസര്‍ സ്ഥലം സന്ദര്‍ശിച്ചു.