ഓച്ചിറ: ബാങ്കില്‍ അടയ്ക്കാന്‍ കൊണ്ട് വന്ന 20 ലക്ഷം രൂപ അടങ്ങിയ ബാഗ് തട്ടിയെടുത്ത യുവാക്കളില്‍ ഒരാള്‍ കൂടി പിടിയില്‍. ആലുംപീടിക പ്രയാര്‍ തെക്ക് മണി മന്ദിരം വീട്ടില്‍ വിഷ്ണു (28)നെയാണ് പൊലിസ് പിടികൂടിയത്. ഇയാളോടൊപ്പം ബൈക്കില്‍ എത്തി പണം തട്ടിയെടുത്ത പ്രതികളില്‍ ഒരാളായ കിഷോര്‍ (28)നെ സംഭവ ദിവസം തന്നെ പിടികൂടി റിമാന്‍ഡ് ചെയ്തിരുന്നു. ബൈക്കില്‍ എത്തിയാണ് ഇവര്‍ പണം തട്ടിയെടുക്കാന്‍ ശ്രമിച്ചത്. ഏതാനും ദിവസങ്ങള്‍ക്ക് മുന്‍പ് ഉച്ചയ്ക്ക് 12.30ന് ഓച്ചിറ ഫെഡറല്‍ബാങ്കിന് മുന്നിലായിരുന്നു സംഭവം.കല്ലൂര്‍ മുക്കിലെ ബീവറേജസിലെ സിവിള്‍ സപ്ലൈസ്സിലെ പണം റൈറ്റര്‍ സേഫ് ഗാര്‍ഡിലെ ജീവനക്കാരനായ ചുനക്കര സ്വദേശിയായ രമണന്‍ ആണ് പണം അടങ്ങിയ ബാഗുമായി ബൈക്കില്‍ ബാങ്കില്‍ പണം അടയ്ക്കാന്‍ എത്തിയത്.
ബാങ്കിനു മുന്‍പിലെത്തി ഹെല്‍മറ്റ് ഊരി മാറ്റുന്നതിനിടെ മറ്റൊരു ബൈക്കില്‍ എത്തിയ രണ്ട് യുവാക്കളില്‍ ഒരാള്‍ ഓടി വന്ന് മുളക്‌സ്‌പ്രേ രമണന്റെ മുഖത്ത് അടിക്കാന്‍ ശ്രമിക്കുകയായിരുന്നു. ഇതിനിടെ പണം കൈക്കലാക്കിയ കിഷോര്‍ ദൂരെ സ്റ്റാര്‍ട്ടാക്കി നിര്‍ത്തിയിരുന്ന ബൈക്കിന്റെ അടുക്കലേക്ക് ഓടുന്നതിനിടെ രമണനും പിന്നാലെ ബഹളം ഉണ്ടാക്കി ഓടിയെത്തി നാട്ടുകാരുടെ സഹായത്താല്‍ കിഷോറിനെ പിടികൂടുകയായിരുന്നു. ഉടന്‍ പൊലിസ് എത്തി യുവാവിനെ കസ്റ്റഡിയില്‍ എടുത്തു. ബൈക്കുമായി നിന്ന ഇയാളുടെ സുഹൃത്ത് കടന്ന് കളയുകയും ചെയ്തു. ഇതോടെ ഈ കേസിലെ രണ്ട് പേരേയും ഓച്ചിറ എസ്.ഐ.വിനോദ് ചന്ദ്രനും സംഘവും അറസ്റ്റ് ചെയ്യുകയായിരുന്നു.