തിരുവനന്തപുരം: സിവില്‍ സര്‍വിസ് ദന്തഗോപുര സംവിധാനമാണെന്നു കരുതി ഒറ്റപ്പെട്ടു കഴിയുന്നതിനു പകരം സര്‍വിസ് കാലം ജനസേവനത്തിനു വിനിയോഗിക്കുകയാണു വേണ്ടതെന്ന മുഖ്യമന്ത്രി പിണറായി വിജയന്‍.
വിരമിക്കുന്ന ചീഫ് സെക്രട്ടറി എസ്.എം.വിജയാനന്ദിനും പൊതുഭരണ വകുപ്പ് അഡീഷനല്‍ ചീഫ് സെക്രട്ടറി ഷീല തോമസിനും സെക്രട്ടേറിയറ്റ് ദര്‍ബാര്‍ ഹാളില്‍ നല്‍കിയ യാത്രയയപ്പ് പരിപാടിയില്‍ സംസാരിക്കുകയായിരുന്നു മുഖ്യമന്ത്രി.
വിജയാനന്ദും ഷീല തോമസും സമര്‍പ്പിത സേവനത്തിലൂടെ എല്ലാവരുടെയും സ്‌നേഹാദരവുകള്‍ ഏറ്റുവാങ്ങിയവരാണെന്നു മുഖ്യമന്ത്രി പറഞ്ഞു. കേരള ജനതയുടെ സ്‌നേഹാദരവുകളുടെ മാധുര്യമാണ് ഈ യാത്രയയപ്പിനുള്ളത്.
സിവില്‍ സര്‍വിസ് ഉദ്യോഗസ്ഥരെക്കുറിച്ചുള്ള പൊതുധാരണയ്ക്ക് വിരുദ്ധമായി ജനകീയ പ്രശ്‌നങ്ങളില്‍ ഏതൊരു പൊതുപ്രവര്‍ത്തകനുമൊപ്പം, ചിലപ്പോള്‍ അതിലും മേലെയും കരുതല്‍ പുലര്‍ത്താനും ഇടപെടല്‍ നടത്താനും ഇരുവര്‍ക്കും കഴിഞ്ഞു. ശുദ്ധവും പ്രവര്‍ത്തനമികവാര്‍ന്നതുമായ ഒരു സേവനഘട്ടമാണ് ഇരുവര്‍ക്കുമുള്ളത്. അധികാര വികേന്ദ്രീകരണവും ജനകീയാസൂത്രണവും നടപ്പാക്കുന്നതിലും കുടുംബശ്രീക്ക് ജനശ്രദ്ധ നേടിക്കൊടുക്കുന്നതിലും എസ്.എം വിജയാനന്ദ് വഹിച്ച പങ്ക് എടുത്തുപറയേണ്ടതാണെന്നും മുഖ്യമന്ത്രി പറഞ്ഞു.
മന്ത്രിമാരായ ഇ. ചന്ദ്രശേഖരന്‍, മാത്യു ടി. തോമസ്, രാമചന്ദ്രന്‍ കടന്നപ്പള്ളി, ടി.എം തോമസ് ഐസക് ആശംസകള്‍ നേര്‍ന്നു. സ്ഥാനമൊഴിയുന്ന ചീഫ് സെക്രട്ടറി എസ്.എം വിജയാനന്ദ്, ഷീലാ തോമസ് എന്നിവര്‍ മറുപടി പറഞ്ഞു. ഉദ്യോഗസ്ഥ ഭരണപരിഷ്‌കാര വകുപ്പ് പ്രിന്‍സിപ്പല്‍ സെക്രട്ടറി സത്യജീത് രാജന്‍ സ്വാഗതം പറഞ്ഞു.