റിയാദ്: രാജ്യത്ത് വ്യാപകമായി കൊണ്ടിട്ടിരിക്കുന്ന കൊറോണ വൈറസ് ബാധ തടയുന്നതിന്റെ ഭാഗമായി ആരോഗ്യ മന്ത്രാലയത്തിന് പൂർണ്ണ സഹായം നൽകി വിദ്യാഭ്യാസ മന്ത്രാലയം. യൂണിവേഴ്സിറ്റികൾക്ക് കീഴിലെ ആശുപത്രികളും കെട്ടിടങ്ങളും വിട്ടു നൽകിയാണ് വിദ്യാഭ്യാസ മന്ത്രാലയം പൂർണ്ണ പിന്തുണ നൽകുന്നത്. രാജ്യത്തെ വിവിധ സർവ്വകലാശാലകൾ ഏത് അടിയന്തിര ഘട്ടത്തിലും ആരോഗ്യ മന്ത്രാലയത്തെ സഹായിക്കാനായി പദ്ധതികളും  തയ്യാറാക്കിയിട്ടുണ്ട്. മുവ്വായിരത്തിലധികം ബെഡുകൾ സജ്ജീകരിച്ചതടക്കം വിവിധ മുൻകരുതലുകളാണ് സർവ്വകലാശാലകൾ സ്വീകരിച്ചത്.
   നിലവിൽ രാജ്യത്തെ കോവിഡ് -19 വൈറസ് ബാധിതരുടെ എണ്ണം 1203 ആണ്. എന്നാൽ സർവ്വകലാശാലകൾ മുവ്വായിരത്തിലധികം ബെഡുകളാണ് സജ്ജീകരിച്ചിരിക്കുന്നത്. കൂടാതെ, മെഡിക്കൽ ക്വാറന്റൈനിനായി  ഇരുപത് യൂണിവേഴ്‌സിറ്റികൾ തങ്ങളുടെ 77 ലധികം കെട്ടിടങ്ങളും ഒഴിവാക്കി  കൊടുത്തിട്ടുണ്ട്. ഫെബ്രുവരി 1 മുതൽ എല്ലാ സർവകലാശാലകളുടേയും അടിയന്തര പദ്ധതികൾ അപ്‌ഡേറ്റ് ചെയ്യാനും ആശുപത്രികൾക്ക് ആവശ്യമായ ഉപകരണങ്ങൾ സജ്ജീകരിക്കാനും വിദ്യാഭ്യാസ മന്ത്രാലയം നിർദേശം നൽകിയിരുന്നതായി ഉന്നത വിദ്യാഭ്യാസ വകുപ്പ് വക്താവ് താരിഖ് അൽ അഹ്‌മരി പറഞ്ഞു.
  നിലവിൽ സഊദിയിൽ ഞായറാഴ്ച്ച വരെ 1299 കൊറോണ വൈറസ് ബാധ കേസുകളാണ് റിപ്പോർട്ട് ചെയ്‌തത്‌. ഇതിൽ 66 പേർ പൂർണ്ണ മോചിതരാവുകയും ചെയ്‌തു. ഇന്ന് നാല് പേർ കൂടി മരണപ്പെട്ടതോടെ രാജ്യത്തെ കൊവിഡ് മരണം എട്ടായി ഉയർന്നിട്ടുണ്ട്. ഇതിനകം സഊദി ആരോഗ്യ മന്ത്രാലയം 51,000 വിപുലമായ ലബോറട്ടറി പരിശോധനകൾ നടത്തി. ജനസംഖ്യാ അനുപാതത്തിൽ ബന്ധപ്പെടുത്തുമ്പോൾ  ഏറ്റവും കൂടുതൽ ടെസ്റ്റുകൾ നടത്തുന്ന ലോകത്തിലെ മികച്ച 10 രാജ്യങ്ങളിൽ ഏറ്റവും മുന്നിലാണ് സഊദി അറേബ്യയെന്നാണ് ഇത് വ്യക്തമാക്കുന്നതെന്ന് സഊദി ആരോഗ്യ മന്ത്രാലയ വക്താവ് ഡോ: മുഹമ്മദ് അൽ അബ്ദ് അൽ ആലി പറഞ്ഞു.