കോട്ടയം: കെവിന്‍ വധക്കേസിലെ  മുഖ്യ പ്രതി ഷാനു ചാക്കോയുടെ അമ്മ രഹ്‌നയുടെ അടുത്ത ബന്ധുവാണ് കോട്ടയം എസ്.പിയായിരുന്ന മുഹമ്മദ് റഫീഖ് എന്ന് കേസില്‍ അറസ്റ്റിലായ എസ്.ഐയുടെ ആരോപണം. ഗാന്ധിനഗര്‍ എ.എസ്.ഐ ബിജുവിന്റെ അഭിഭാഷകന്‍ ഏറ്റുമാനൂര്‍ കോടതിയിലാണ് ഇക്കാര്യം അറിയിച്ചത്. കേസില്‍ നേരിട്ട് ഉള്‍പ്പെട്ടിട്ടുള്ള ഉന്നത ഉദ്യേഗസ്ഥരെ സ്ഥലം മാറ്റുക മാത്രം ചെയ്ത് മറ്റുള്ളവരെ കുടുക്കുകയായിരുന്നെന്നും ബിജുവിന് വേണ്ടി അഭിഭാഷകന്‍ കോടതിയില്‍ പരാതിപ്പെട്ടു.

കെവിനെ തട്ടിക്കൊണ്ടുപോയവരെ സഹായിച്ചെന്ന പേരിലാണ് എ.എസ്.ഐ ബിജുവിനെ പൊലിസ് അറസ്റ്റ് ചെയ്തത്. പൊലിസ് ഡ്രൈവര്‍ അജയകുമാറിനെയും അറസ്റ്റ് ചെയ്തിരുന്നു.

അതിനിടെ,കേസന്വേഷണത്തിന്റെ കാര്യത്തില്‍ തെറ്റിദ്ധരിപ്പിച്ചെന്ന ആരോപണത്തില്‍ മുഹമ്മദ് റഫീഖിനെതിരെ വകുപ്പ് തല അന്വേഷണത്തിന് മുഖ്യമന്ത്രി പിണറായി വിജയന്‍ നിര്‍ദേശിച്ചിട്ടുണ്ട്.

എന്നാല്‍,ആരോപണങ്ങള്‍ നിഷേധിച്ച് മുഹമ്മദ് റഫീഖ് രംഗത്തുവന്നു. തനിക്ക് കൊല്ലം ജില്ലയില്‍ ബന്ധുക്കളില്ലെന്ന് അദ്ദേഹം പ്രതികരിച്ചു.