എടപ്പാള്‍: സീനിയര്‍ വിദ്യാര്‍ഥികള്‍ റാഗ് ചെയ്തതിനെത്തുടര്‍ന്നു പ്ലസ് വണ്‍ വിദ്യാര്‍ഥിക്കു പരുക്ക്. കാടഞ്ചേരി ഹയര്‍സെക്കന്‍ഡറി സ്‌കൂള്‍ പ്ലസ് വണ്‍ വിദ്യാര്‍ഥിയും കാടഞ്ചേരി കോട്ടപറമ്പില്‍ അബ്ദുള്‍ അസീസിന്റെ മകനുമായ ബാസില്‍അസീസി( 16)നെയാണു പരുക്കുകളോടെ എടപ്പാളിലെ സ്വകാര്യ ആശുപത്രിയില്‍ പ്രവേശിപ്പിച്ചത്.പ്ലസ് വണ്‍ ക്ലാസ് തുടങ്ങി രണ്ടാം ദിനമായ ഇന്നലെ രാവിലെ പതിനൊന്നരക്കാണു ബാസിലിനെ എട്ടു പേരടങ്ങുന്ന സീനിയര്‍ വിദ്യാര്‍ഥികള്‍ ആദ്യം റാഗ് ചെയ്യുന്നത്.
ടീ ഷര്‍ട്ട് ഇട്ടതിനെ സീനിയര്‍ വിദ്യാര്‍ഥികള്‍ ചോദ്യം ചെയ്യുകയായിരുന്നു. തുടര്‍ന്നു സീനിയര്‍ വിദ്യാര്‍ഥികളുടെ നിര്‍ദേശം അനുസരിക്കാമെന്നു സമ്മതിച്ച ബാസിലിനെ പിന്നീടു ബാത്ത് റൂമിനു സമീപത്തു വെച്ചും തുടര്‍ന്നു ക്ലാസ് റൂമില്‍ വെച്ചും സംഘം ചേര്‍ന്നു മര്‍ദിക്കുകയായിരുന്നു. ബാസിലിന് കൈക്കു പരുക്കുണ്ട്.രക്ഷിതാവിന്റെ പരാതിയെ ത്തുടര്‍ന്നു പൊന്നാനി പൊലീസ് സ്ഥലത്തെത്തി വിദ്യാര്‍ഥിയില്‍ നിന്നു മൊഴിയെടുത്തു കേസ് രജിസ്റ്റര്‍ ചെയ്തു.