വാളയാര്‍: സംസ്ഥാന ഫോറസ്റ്റ് ട്രെയ്‌നിങ് ഇന്‍സ്റ്റിറ്റ്യൂട്ടില്‍ 39 ബീറ്റ് ഫോറസ്റ്റ് ഓഫിസര്‍മാര്‍ കൂടി പരിശീലനം പൂര്‍ത്തിയാക്കി. ഇന്‍സ്റ്റിറ്റ്യൂട്ട് ഗ്രൗണ്ടില്‍ നടന്ന പാസിങ് ഔട്ട് പരേഡില്‍ ഈസ്റ്റേണ്‍ സര്‍ക്കിള്‍ ചീഫ് കണ്‍സര്‍വേറ്ററും കസ്റ്റോഡിയന്‍ ഓഫ് വെസ്റ്റഡ് ഫോറസ്റ്ററുമായ എല്‍ ചന്ദ്രശേഖര്‍ സല്യൂട്ട് സ്വീകരിച്ചു.
ബിരുദദാന സമ്മേളനവും അദ്ദേഹം ഉദ്ഘാടനം ചെയ്തു. ഫോറസ്റ്റ് ട്രെയ്‌നിങ് ഡയറക്ടര്‍ യോഗേഷ് നീല്‍കണ്ഠ്, അക്കാദമി ഓഫിസറും വൈസ് പ്രിന്‍സിപ്പലുമായ കെ.എം.ശ്രീകുമാര്‍, പാലക്കാട് ഫ്‌ലയിങ് സ്‌ക്വാഡ് ഡിവിഷനല്‍ ഫോറസ്റ്റ് ഓഫിസര്‍ സൈനുല്‍ അബുദ്ദീന്‍, ഫ്‌ലയിങ് സ്‌ക്വാഡ് റേഞ്ച് ഫോറസ്റ്റ് ഓഫിസര്‍ കെ ശശിധരന്‍, ഇന്‍സ്ട്രക്ടര്‍ എം അനില്‍കുമാര്‍, ജൂനിയര്‍ സൂപ്രണ്ട് പി എല്‍ ഗോപാലകൃഷ്ണന്‍, എന്‍ ടി സിബിന്‍ പ്രസംഗിച്ചു.
ഫോറസ്റ്റ് ട്രെയ്‌നിങ് ഇന്‍സ്റ്റിറ്റ്യൂട്ടില്‍ നിന്ന് ഈ വര്‍ഷം പരിശീലനം പൂര്‍ത്തിയാക്കുന്ന രണ്ടാമത്തെ ബാച്ചാണിത്.
കഴിഞ്ഞ മൂന്നിനു 39 ബീറ്റ് ഫോറസ്റ്റ് ഓഫിസര്‍മാര്‍ കൂടി പരിശീലനം പൂര്‍ത്തിയാക്കിയിരുന്നു.
ഒന്‍പതു മാസത്തെ പരിശീലനത്തിനു ശേഷമാണു ബീറ്റ് ഓഫിസര്‍മാര്‍ സംസ്ഥാനത്തെ വിവിധ വനം ഡിവിഷനല്‍ ഓഫിസുകളില്‍ ജോലിയില്‍ പ്രവേശിപ്പിക്കപ്പെടുന്നത്.
തൃശൂര്‍ പൊലിസ് അക്കാദമിയില്‍ മൂന്നു മാസവും വാളയാര്‍ ഫോറസ്റ്റ് ട്രെയ്‌നിങ് ഇന്‍സ്റ്റിറ്റ്യൂട്ടില്‍ ആറു മാസത്തെയും പരിശീലനമാണ് ഇവര്‍ പൂര്‍ത്തിയാക്കിയത്.
വന്യജീവികളുടെ പുനരധിവാസം, സംരക്ഷണം തുടങ്ങി ഒട്ടേറെ വിഷയങ്ങളില്‍ പരിശീലനം പൂര്‍ത്തിയാക്കി.