കൊച്ചി:ഇനി അവധിക്കാലം.വാര്‍ഷികപരീക്ഷയ്ക്ക് വിരാമമായതോടെ വിദ്യാര്‍ഥികളുടെ പിരിമുറുക്കം മാറി.ഇനി രണ്ട്മാസക്കാലം ഓടിക്കളിക്കാമല്ലോ എന്നായിരുന്നു പലരുടെയും മനസ്സില്‍. പക്ഷേ എസ്.എസ്.എല്‍.സി കണക്ക് പരീക്ഷ ഇന്നലെ വീണ്ടും നടത്തേണ്ടിവന്നതിനെ തുടര്‍ന്ന് തങ്ങളുടെ അവസാന പരീക്ഷകള്‍ നല്ലരീതിയില്‍ എഴുതാന്‍ കഴിഞ്ഞില്ലെന്ന പരാതിയും ചിലര്‍ക്കുണ്ട്.ഇന്നലെ രാവിലെയും ഉച്ചയ്ക്കുമായി നടത്തേണ്ടിയിരുന്ന പരീക്ഷകള്‍ ഉച്ചയ്ക്ക് 12 മണിക്ക് മുമ്പ് നടത്തിയതാണ് കുട്ടികള്‍ക്ക് വിനയായത്.രാവിലെ എട്ട് മണിമുതല്‍ തന്നെ മിക്ക സ്‌കൂളുകളിലും പരീക്ഷ ആരംഭിച്ചിരുന്നു. ഒരു പരീക്ഷ കഴിഞ്ഞ് സാവകാശം നല്‍കാതെ ഉച്ചയ്ക്ക്‌ശേഷം നടത്തേണ്ട പരീക്ഷ ഉടന്‍ നടത്തിയതാണ് വിദ്യായര്‍ഥികള്‍ക്ക് വിനയായത്. മറ്റുസ്‌കൂളുകളില്‍ എസ്.എല്‍.സി പരീക്ഷാ ഡ്യൂട്ടിക്ക് നിയോഗിക്കപ്പെട്ട അധ്യാപകരും നന്നേ പാടുപെട്ടു.എസ്.എസ്.എല്‍.സി പരീക്ഷ 12.45 തുടങ്ങുന്നതിനുമുമ്പ് ഇവര്‍ സ്‌കൂളുകളിലെത്തിയത് ഉച്ചഭക്ഷണം പോലും ഉപേക്ഷിച്ചാണ്.എന്നാല്‍ രണ്ടാമത് നടന്ന കണക്കുപരീക്ഷ ഗംഭീരമായി എഴുതാന്‍ കഴിഞ്ഞതിന്റെ സന്തോഷത്തിലായിരുന്നു എസ്.എസ്.എല്‍.സി വിദ്യാര്‍ഥികള്‍.