ചങ്ങരംകുളം: മരുഭൂമിയില്‍ മാത്രമല്ല, ചങ്ങരംകുളത്തും ഈന്തപ്പനക്കുലകള്‍ വിളഞ്ഞു. ചങ്ങരംകുളത്തിനടുത്ത് കാഞ്ഞിയൂരില്‍ പടാത്ത് ബഷീര്‍, റഷീദ് സഹോദരങ്ങളുടെ വീട്ടിലെ ഈന്തപ്പനകളില്‍ ഒന്നാണ് രണ്ടു മാസം മുന്‍പു കുലച്ചത്.
പുതിയ വീട് പണിതപ്പോള്‍ കൗതുകത്തിനായി ഒരു വര്‍ഷം മുന്‍പു മണ്ണുത്തിയില്‍നിന്നു വാങ്ങിയ രണ്ട് ഈന്തപ്പനത്തൈകളില്‍ ഒന്നാണ് കായ്ച്ചത്. ഇവ ഇപ്പോള്‍ ഭക്ഷിക്കാന്‍ പാകമായിട്ടുണ്ട്. സഊദി അറേബ്യയില്‍ ജോലി ചെയ്യുന്ന സഹോദരങ്ങളായ സെയ്ദ്, ജബ്ബാര്‍ എന്നിവര്‍ ചേര്‍ന്നാണ് സഹോദരന്‍മാരുടെ പുതിയ വീട്ടിലേക്കു ചെടികള്‍ വാങ്ങുന്നതിനൊപ്പം ഈന്തപ്പനകളും വാങ്ങിച്ചത്.
പ്രത്യേകിച്ചു പരിചരണമൊന്നും നല്‍കിയിരുന്നില്ലെന്നും കാലാവസ്ഥ അനുകൂലമായതാകാം ഈന്തപ്പന കായ്ക്കാന്‍ കാരണമെന്നുമാണ് വീട്ടുകാര്‍ പറയുന്നത്.