കണ്ണൂര്‍: കൊവിഡ് നിരീക്ഷണത്തില്‍ കഴിയുന്നവരുടെ വിവരങ്ങള്‍ രഹസ്യമാക്കി വെക്കുമെന്ന സര്‍ക്കാരിന്റെ ഉറപ്പ് പാഴാവുന്നു. മുഖ്യമന്ത്രിയുടെ നാട്ടില്‍ തന്നെ ഇത് തെറ്റിച്ചതായാണ് റിപ്പോര്‍ട്ട്. കണ്ണൂരില്‍ കോവിഡ് നിരീക്ഷണത്തില്‍ കഴിയുന്നവരുടെ ഫോണ്‍ നമ്പര്‍ അടക്കമുളള വിവരങ്ങള്‍ സി.പി.എം ജില്ലാ സെക്രട്ടറിക്ക് ലഭിച്ചതായി മീഡിയ വണ്‍ റിപ്പോര്‍ട്ട് ചെയ്യുന്നു.

വീടുകളിലും ആശുപത്രികളിലും നിരീക്ഷണത്തില്‍ കഴിയുന്നവരുടെ ഫോണുകളിലേക്ക് സി.പി.എം ജില്ലാ സെക്രട്ടറിയുടെ ആശംസാ സന്ദേശം ലഭിച്ചതായാണ് റിപ്പോര്‍ട്ടിലുള്ളത്. ഇതിനെതിരെ പരാതി നല്‍കിയിട്ടും നടപടിയുണ്ടായില്ലെന്നും ആരോപണമുണ്ട്.

കണ്ണൂര്‍ ജില്ലയില്‍ ഒരാള്‍ വീടുകളിലോ ആശുപത്രികളിലോ നിരീക്ഷണത്തിലായാല്‍ അവരുടെ മൊബൈല്‍ ഫോണുകളിലേക്ക് ആദ്യം എത്തുന്നത് കലക്ടര്‍ ടി.വി സുഭാഷിന്റെ ആശംസാ സന്ദേശമാണ്. തൊട്ട് പിന്നാലെ സി.പി.എം ജില്ലാ സെക്രട്ടറി എം.വി ജയരാജന്റെ സന്ദേശവും ഇവരുടെ ഫോണിലെത്തുന്നുണ്ട്.

നിരീക്ഷണത്തില്‍ കഴിയുന്നവരുടെ വിവരങ്ങള്‍ രഹസ്യമാക്കി വെക്കണമെന്നിരിക്കെയാണ് ഫോണ്‍ നമ്പര്‍ അടക്കമുളള വ്യക്തി വിവരങ്ങള്‍ സി.പി.എം ജില്ലാ സെക്രട്ടറിക്ക് ലഭിച്ചത്. സന്ദേശം ലഭിച്ച ചിലര്‍ എം.വി ജയരാജനെ നേരിട്ട് വിളിച്ചു. അവരോട് താനാണന്ന് സന്ദേശമയച്ചതെന്ന് ജയരാജന്‍ സ്ഥിരീകരിക്കുകയും ചെയ്തിട്ടുണ്ട്.

കണ്ണൂരിലെ ചില സ്വകാര്യ ആശുപത്രികള്‍ക്കും ഈ വിവരങ്ങള്‍ ചോര്‍ന്ന് കിട്ടിയതായി പരാതിയുണ്ട്. നിരീക്ഷണത്തില്‍ കഴിയുന്നവര്‍ ഇത് സംബന്ധിച്ച് ആരോഗ്യമന്ത്രിയുടെ ഓഫിസിലും കലക്ടര്‍ക്കും പരാതി നല്‍കിയെങ്കിലും ഒരു നടപടിയുമുണ്ടായില്ല.