റിയാദ്: സഊദിയിൽ കൊവിഡ്-19 വൈറസ് ബാധിച്ച് ആറ് പേർ കൂടി മരിച്ചു. ഇതോടെ രാജ്യത്ത് കോവിഡ് ബാധിച്ച് മരിച്ചവരുടെ എണ്ണം 16 ആയി ഉയർന്നു. വൈറസ് ബാധിതരുടെ എണ്ണം 1720 ആയി ഉയരുകയും ചെയ്‌തിട്ടുണ്ട്‌. ഇന്ന് പുതുതായി 157 കേസുകൾ കൂടി സ്ഥിരീകരിച്ചതോടെയാണിത്. സഊദി ആരോഗ്യ മന്ത്രാലയമാണ് ഇക്കാര്യം അറിയിച്ചത്. മദീനയിൽ മൂന്ന് വിദേശികളും ഒരു സ്വദേശിയും മക്ക, റിയാദ് എന്നിവിടങ്ങളിൽ വിദേശികളുമാണ് മരിച്ചത്. ഇതോടെ 24 മണിക്കൂറിനിടെ വൈറസ് ബാധയേറ്റു രാജ്യത്ത് മരണപ്പെടുന്ന വിദേശികൾ ആറായി ഉയർന്നു. വൈറസ് ബാധിതരിൽ ഭൂരിഭാഗം പേരും നല്ല ആരോഗ്യവസ്ഥയിലാണെന്നും തിരിച്ചു വരാനാകുമെന്നും ശുഭ പ്രതീക്ഷയിലാണെന്നും മന്ത്രാലയം കഴിഞ്ഞ ദിവസം അറിയിച്ചിരുന്നു. എന്നാൽ, ഏതാനും ദിവസങ്ങളായി വൈറസ് ബാധിതരുടെ എണ്ണം ദിനം പ്രതി വർധിക്കുന്നതായാണ് റിപ്പോർട്ടുകൾ സൂചിപ്പിക്കുന്നത്. ഇന്നത്തെ കണക്കുകളുൾപ്പെടെ സഊദിയിൽ 264 പേരാണ് രോഗമുക്തി നേടിയതെന്നു ആരോഗ്യ മന്ത്രാലയം അറിയിച്ചു.

#الصحة تعلن عن تسجيل (157) حالة إصابة جديدة بفيروس #كورونا الجديد (كوفيد19)، وتسجيل (6) حالات وفيات رحمهم الله، وتسجيل (99) حالة تعافي ليصبح مجموع الحالات المتعافية (264) حالة ولله الحمد. pic.twitter.com/fLO0W2asL0

— و ز ا ر ة ا لـ صـ حـ ة السعودية (@SaudiMOH) April 1, 2020

       ഇന്ന് ഏറ്റവും കൂടുതല്‍ കേസുകള്‍ റിപ്പോര്‍ട്ട് ചെയ്തത് മദീനയിലാണ്. 78 കേസുകളാണ് മദീനയില്‍ റിപ്പോര്‍ട്ട് ചെയ്തത്. കൂടാതെ, മക്കയിൽ 55 കേസുകളും റിപ്പോര്‍ട്ട് ചെയ്‌തിട്ടുണ്ട്‌. അതേസമയം, ഇന്ന് റിയാദിൽ വൈറസ് ബാധിതരുടെ എണ്ണം താരതമേന്യ കുറവാണ് രേഖപ്പെടുത്തിയത്. ഏഴു വൈറസ് ബാധയാണ് റിയാദിൽ സ്ഥിരീകരിച്ചത്. കിഴക്കൻ പ്രവിശ്യയിലെ ദമാമിൽ ഇന്ന് ഒരു കേസ് പോലും സ്ഥിരീകരിച്ചില്ലായെന്നത് ആശ്വാസമാണ്. കിഴക്കൻ പ്രവിശ്യയിലെ തന്നെയുള്ള ഖത്വീഫിൽ ആറും ഹുഫൂഫിൽ മൂന്നും, ജിദ്ദ 3, തബൂക്ക് 2. താഇഫ് 02, അല്‍ ഹിനാകിയ 01 എന്നിങ്ങനെയാണ് ഇന്ന് സ്ഥിരീകരിച്ച വൈറസ് ബാധ കേസുകൾ.