പാരിസ്: പരുക്കും ഫോമില്ലായ്മയും അലട്ടിയ മുന്‍ ലോക ഒന്നാം നമ്പര്‍ താരം സെര്‍ബിയയുടെ നൊവാക് ദ്യോകോവിച് ഫ്രഞ്ച് ഓപണ്‍ ടെന്നീസ് പോരില്‍ കുതിപ്പ് തുടരുന്നു. പ്രീ ക്വാര്‍ട്ടറില്‍ സ്പാനിഷ് താരം ഫെര്‍ണാണ്ടോ വെര്‍ഡസ്‌ക്കോയെ വീഴ്ത്തിയ ദ്യോക്കോവിച് ക്വാര്‍ട്ടറിലേക്ക് മുന്നേറി. മൂന്ന് സെറ്റ് നീണ്ട പോരില്‍ അനായാസ വിജയമാണ് ദ്യോക്കോവിച് സ്വന്തമാക്കിയത്. സ്‌കോര്‍: 6-3, 6-2, 6-2.
തിരിച്ചുവരവുകളുടെ രാജാവായ ജര്‍മന്‍ യുവ താരം അലക്‌സാണ്ടര്‍ സ്വരേവും കടുത്ത പോരാട്ടം അതിജീവിച്ച് ക്വാര്‍ട്ടറിലെത്തി. പ്രീ ക്വാര്‍ട്ടറില്‍ റഷ്യന്‍ താരം കരന്‍ ഖചനോവിനെ അഞ്ച് സെറ്റ് പോരാട്ടത്തില്‍ വീഴ്ത്തിയാണ് സ്വരേവിന്റെ മുന്നേറ്റം. സ്‌കോര്‍: 4-6, 7-6 (7-4), 2-6, 6-3, 6-3.
ജപ്പാന്‍ താരം കെയ് നിഷികോരിയെ പരാജയപ്പെടുത്തി ഓസ്ട്രിയന്‍ യുവ താരം ഡൊമിനിക്ക് തീമും ക്വാര്‍ട്ടര്‍ ബര്‍ത്ത് ഉറപ്പാക്കി. നാല് സെറ്റ് നീണ്ട പോരില്‍ 6-2, 6-0, 5-7, 6-4 എന്ന സ്‌കോറിനാണ് തീമിന്റെ വിജയം. ക്വാര്‍ട്ടറില്‍ സ്വരേവ്- തീം പോരാട്ടം അരങ്ങേറും.
വനിതാ വിഭാഗത്തില്‍ കഴിഞ്ഞ തവണത്തെ യു.എസ് ഓപണ്‍ ജേത്രി അമേരിക്കന്‍ യുവ താരം സ്ലോവനെ സ്റ്റെഫന്‍സ് കന്നി ഫ്രഞ്ച് ഓപണ്‍ ക്വാര്‍ട്ടര്‍ ഉറപ്പാക്കി. പ്രീ ക്വാര്‍ട്ടറില്‍ താരം എസ്റ്റോണിയയുടെ അന്നറ്റ് കൊണ്ടവെയ്റ്റിനെ അനായാസം വീഴ്ത്തി. സ്‌കോര്‍: 6-2, 6-0.
ചെക്ക് റിപ്പബ്ലിക്കിന്റെ ബാര്‍ബറ സ്‌ട്രൈക്കോവയെ കീഴടക്കി കസാഖിസ്ഥാന്‍ താരം യുലിയ പുടിന്‍സേവയും അവസാന എട്ടിലെത്തി. സ്‌കോര്‍: 6-4, 6-3. മറ്റൊരു അമേരിക്കന്‍ താരം മാഡിസന്‍ കീസും ക്വാര്‍ട്ടറുറപ്പിച്ചു. റൊമാനിയന്‍ താരം മിഹേല ബുസനേസ്‌ക്കുവിനെയാണ് കീസ് പരാജയപ്പെടുത്തിയത്. സ്‌കോര്‍: 6-1, 6-4.