കൊടുവള്ളി: പട്ടികജാതി കുടുംബത്തിന്റെ വീടിനു ഭീഷണിയായി സമീപത്തെ പറമ്പില്‍ നിന്നു മണ്ണെടുത്ത സ്വകാര്യ വ്യക്തികള്‍ സര്‍ക്കാര്‍ ഉത്തരവുണ്ടായിട്ടും സുരക്ഷാ സംവിധാനമൊരുക്കാന്‍ തയാറാവുന്നില്ലെന്നു പരാതി. കൊടുവള്ളി നഗരസഭ 33-ാം ഡിവിഷന്‍ നെല്ലാംകണ്ടി അങ്ങാടിക്കു സമീപം കണ്ടാലമ്മല്‍ സ്മിതയുടെ വീടിനോടു ചേര്‍ന്ന പറമ്പില്‍ നിന്നാണ് അപകടകരമാംവിധം സ്വകാര്യ വ്യക്തികള്‍ മണ്ണെടുത്തത്.
മണ്ണെടുപ്പ് വീടിനും ജീവനും ഭീഷണിയാവുന്നുവെന്നു കാണിച്ചു വീട്ടുകാര്‍ താമരശ്ശേരി താലൂക്ക് തഹസില്‍ദാര്‍ക്കു പരാതി നല്‍കുകയും ഇതിനെ തുടര്‍ന്നു നടത്തിയ അന്വേഷണത്തില്‍ വീട് അപകടനിലയിലാണെന്നു കണ്ടെത്തുകയും ചെയ്തിരുന്നു. മണ്ണെടുത്ത ഭാഗം കോണ്‍ക്രീറ്റ് പില്ലര്‍ സ്ഥാപിച്ചു സംരക്ഷണ ഭിത്തി നിര്‍മിച്ചുനല്‍കാന്‍ സ്വകാര്യ വ്യക്തികളോട് ആവശ്യപ്പെട്ട് ഉത്തരവിറക്കുകയും ചെയ്തു. എന്നാല്‍ ഇതു പാലിക്കാന്‍ മണ്ണെടുത്തവര്‍ തയാറാവുന്നില്ലെന്നാണു പരാതി.
പ്രായമായ അമ്മയും ഭര്‍ത്താവും മൂന്നു കുട്ടികളുമടങ്ങുന്ന കുടുംബം മഴയിലും കാറ്റിലും ഭയപ്പാടോടെയാണു വീട്ടില്‍ കഴിയുന്നത്. തഹസില്‍ദാറുടെ ഉത്തരവ് നടപ്പാക്കണമെന്നു കാണിച്ചു മുഖ്യമന്ത്രി, പ്രതിപക്ഷ നേതാവ്, പട്ടികജാതി-വര്‍ഗ വകുപ്പു മന്ത്രി, എം.പി, എം.എല്‍.എ, ജില്ലാ കലക്ടര്‍, നഗരസഭാ ചെയര്‍പേഴ്‌സന്‍ എന്നിവര്‍ക്കു പരാതി നല്‍കി കാത്തിരിക്കുകയാണീ നിര്‍ധന കുടുംബം.