കാസര്‍കോട്: ദുബൈയിലേക്ക് കടത്താന്‍ ശ്രമിച്ച 27 ലക്ഷത്തിന്റെ വിദേശ കറന്‍സിയുമായി കാസര്‍കോട് സ്വദേശി മംഗളൂരു വിമാനത്താവളത്തില്‍ പിടിയിലായി. മധൂര്‍ പട്‌ളയിലെ മര്‍സാഖ് മുഹമ്മദാണ് (26) കസ്റ്റംസ് അധികൃതരുടെ പിടിയിലായത്.
കഴിഞ്ഞ ദിവസം രാത്രി 11.20ന്റെ ജെറ്റ് എയര്‍വെയ്‌സ് വിമാനത്തില്‍ ദുബൈയിലേക്ക് പോകാനെത്തിയ ഇയാളില്‍ നിന്ന് 27,04,232 രൂപ മൂല്യമുള്ള വിദേശ കറന്‍സിയാണ് പിടിച്ചെടുത്തത് .
സംശയം തോന്നി പരിശോധിച്ചപ്പോഴാണ് ധരിച്ചിരുന്ന ജീന്‍സിനകത്ത് വിദേശ കറന്‍സി കണ്ടെത്തിയത്. പ്രത്യേക പോക്കറ്റുകളുണ്ടാക്കിയാണ് കറന്‍സി ഒളിപ്പിച്ചു വച്ചിരുന്നത്. 23,100 അമേരിക്കന്‍ ഡോളര്‍, 12,475 ബ്രിട്ടീഷ് പൗണ്ട്, 1885 യൂറോ, 350 സ്വിസ് ഫ്രാങ്ക് എന്നിവയാണ് പിടിച്ചെടുത്തത്.
പ്രതിയെ റിമാന്‍ഡ് ചെയ്തു. രണ്ടാഴ്ചയ്ക്കിടെ മംഗളൂരു വിമാനത്താവളത്തില്‍ നടക്കുന്ന രണ്ടാമത്തെ വിദേശ കറന്‍സി വേട്ടയാണിത്. കഴിഞ്ഞ 18ന് 69.74 ലക്ഷം രൂപയുടെ വിദേശ കറന്‍സിയുമായി മഞ്ചേശ്വരം കടമ്പാര്‍ മൊറത്തണ വീട്ടില്‍ മുഹമ്മദ് അസ്‌കറിനെ(20) കസ്റ്റംസ് പിടികൂടിയിരുന്നു.