തൊടുപുഴ: ഇടുക്കി മെഡിക്കല്‍ കോളജ് അടച്ചു പൂട്ടാനുള്ള നീക്കത്തെ യു.ഡി.എഫ് ജില്ലാ ചെയര്‍മാന്‍ അഡ്വ. എസ് അശോകനും കണ്‍വീനര്‍ അഡ്വ അലക്സ്സ് കോഴിമലയും അപലപിച്ചു. 

പിന്നോക്ക ജില്ലയായ ഇടുക്കിയോട് സംസ്ഥാന സര്‍ക്കാര്‍ കടുത്ത അവഗണനയാണ് കാണിക്കുന്നത്. സംസ്ഥാനത്തും സംസ്ഥാനത്തിന് പുറത്തുമുള്ള സ്വാകാര്യ മെഡിക്കല്‍ കോളജുകളെ അന്യായമായി സഹായിക്കുകയാണ് സര്‍ക്കാരിന്റെ ഗൂഢലക്ഷ്യമെന്നും ഇതിനു പിന്നില്‍ വന്‍ അഴിമതിയുണ്ടെന്നും സംശയിക്കേണ്ടിയിരിക്കുന്നു. ഇടുക്കി മെഡിക്കല്‍ കോളജില്‍ പഠനത്തിന് യാതൊരു സൗകര്യവും ഇല്ലെന്ന സര്‍ക്കാരിന്റെ വിശദീകരണം ഉത്തരവാദിത്വങ്ങളില്‍ നിന്നുള്ള ഒളിച്ചോട്ടമാണ്.
പഠനത്തിന് യാതൊരു സൗകര്യങ്ങളും ഇല്ലായിരുന്നു എങ്കില്‍ കഴിഞ്ഞ വര്‍ഷം പഠിച്ച് പരീക്ഷ എഴുതിയ വിദ്യാര്‍ഥികള്‍ക്ക് എങ്ങിനെ സംസ്ഥാനത്തെ മുന്തിയ റാങ്കുകള്‍ നേടാനായി എന്നും സര്‍ക്കാര്‍ വ്യക്തമാക്കണം.കോളജിന്റെ അംഗീകാരം നിലനിര്‍ത്താന്‍ ആവശ്യമായ അടിയന്തിര നടപടികള്‍ കൈക്കൊള്ളണമെന്ന് യു.ഡി.എഫ് നേതാക്കള്‍ ആവശ്യപ്പെട്ടു.