റിയാദ്: കൊവിഡ്  ബാധയേറ്റു സഊദിയില്‍ ഇന്നലെ അഞ്ചു മരണം കൂടി സ്ഥിരീകരിച്ചു. ഇതോടെ രാജ്യത്തെ  മരണം 34 ആയി ഉയര്‍ന്നു. പുതുതായി 15 പേര്‍ക്ക് കൂടി ഇന്നലെ വൈറസ് സ്ഥിരീകരിച്ചിട്ടുണ്ട്. ഇതോടെ രാജ്യത്തെ ആകെ വൈറസ് ബാധിതരുടെ എണ്ണം 2,385 ആയി ഉയര്‍ന്നു. നിലവില്‍ രാജ്യത്തിന്റെ വിവിധ ഭാഗങ്ങളിലായി 1,863 ആളുകളാണ് ചികിത്സയില്‍ കഴിയുന്നത്. ഇന്നലെ 68 പേര്‍ കൂടി സുഖം പ്രാപിച്ചതോടെ രാജ്യത്തെ വൈറസ് മോചിതരുടെ എണ്ണം 488 ആയി ഉയര്‍ന്നിട്ടുണ്ട്. ഇതുവരെ രോഗം സ്ഥിരീകരിച്ചവരില്‍ 47 ശതമാനമാണ് സ്വദേശികള്‍ ബാക്കി 53 ശതമാനം രോഗികളും വിദേശികളാണ്. കഴിഞ്ഞ ദിവസം രാവിലെ 191 കേസുകള്‍ റിപ്പോര്‍ട്ട് ചെയ്തിരുന്നു.  ബാക്കിയുള്ള കേസുകളാണ് ഇന്നലെ വൈകിട്ട്   ആരോഗ്യ മന്ത്രാലയം നടത്തിയ വാര്‍ത്താ സമ്മേളനത്തില്‍ അറിയിച്ചത്. ഇതോടെ ഇന്നലെ  പുറത്തു വന്ന റിപ്പോര്‍ട്ട് പ്രകാരം സഊദിയില്‍ 206 പുതിയ വൈറസ് ബാധ കേസുകളാണ് സ്ഥിരീകരിച്ചത്.

     തലസ്ഥാന നഗരിയായ റിയാദില്‍ ചികിത്സയില്‍ കഴിയുന്നത് 588 പേരാണ്. മക്കയില്‍ 346 പേരും ജിദ്ദയില്‍ 218 പേരും മദീനയില്‍ 216 പേരും ഖത്വീഫില്‍ 124 പേരും   ദമാമില്‍ 108 പേരും ചികിത്സയിലുണ്ട്.