ബംഗളൂരു: യാത്രയ്ക്കിടെ യുവതിയെ ആക്രമിച്ച് നഗ്‌നചിത്രങ്ങള്‍ പകര്‍ത്തിയ ഓല ടാക്‌സി ഡ്രൈവര്‍ അറസ്റ്റിലായി. ടാക്‌സി ഡ്രൈവറായ വി. അരുണിനെയാണ് ബംഗളൂരു പൊലിസ് പിടികൂടിയത്. ആര്‍ക്കിടെക്ട് കമ്പനിയില്‍ ജോലി ചെയ്യുന്ന 26കാരിക്കാണ് ടാക്‌സി യാത്രക്കിടെ ദുരനുഭവം ഉണ്ടായത്.
ബംഗളൂരുവില്‍ നിന്ന് മുംബൈയിലേക്കുള്ള വിമാനയാത്രയ്ക്കായി എയര്‍പോര്‍ട്ടില്‍ പോകുന്നതിനാണ് യുവതി ടാക്‌സി വിളിച്ചത്. ജൂണ്‍ ഒന്നിന് പുലര്‍ച്ചെ 2 മണിക്കായിരുന്നു സംഭവം. യാത്രയ്ക്കിടെ തെറ്റായ വഴിയിലൂടെ വാഹനമോടിച്ചത് ചോദ്യം ചെയ്‌തെങ്കിലും ഇതാണ് എളുപ്പ വഴിയെന്നായിരുന്നു ഡ്രൈവറുടെ മറുപടി.
പിന്നീട് വിജനമായ സ്ഥലത്തെത്തിയപ്പോള്‍ ഇയാള്‍ വാഹനം നിര്‍ത്തി പുറത്തിറങ്ങി യുവതിയെ പീഡിപ്പിക്കുകയായിരുന്നു. ഇതിനിടെ യുവതിയുടെ വസ്ത്രങ്ങള്‍ അഴിച്ച് നഗ്‌ന ചിത്രങ്ങളെടുക്കുകയും ചെയ്തു. ചിത്രങ്ങള്‍ വാട്‌സ് ആപ് വഴി പ്രചരിപ്പിക്കുകയും ചെയ്തു.
സംഭവത്തിന് പിന്നാലെ പൊലിസിന് ഇ മെയില്‍ വഴി യുവതി പരാതി നല്‍കി. തുടര്‍ന്ന് നടത്തിയ അന്വേഷണത്തിലാണ് പ്രതിയെ പിടികൂടിയത്.