പാലക്കാട്: പാലക്കാട് ഉപതിരഞ്ഞെടുപ്പില്‍ കോണ്‍ഗ്രസുമായി ഇടഞ്ഞ പി. സരിനെ സ്ഥാനാര്‍ഥിയാക്കാനൊരുങ്ങി സിപിഎം. എല്‍.ഡി.എഫ് സ്ഥാനാര്‍ഥിയായി സരിനെ പരിഗണിക്കണമെന്ന് സിപിഎം പാലക്കാട് ജില്ല സെക്രട്ടറിയേറ്റ് തീരുമാനിച്ചു. സരിന്‍ വരുന്നത് തിരഞ്ഞെടുപ്പില്‍ ഗുണം ചെയ്യുമെന്ന് ജില്ല സെക്രട്ടറിയേറ്റ് സംസ്ഥാന നേതൃത്വത്തെ അറിയിച്ചു. കോണ്‍ഗ്രസിനോട് ഇടഞ്ഞ സരിന്‍ സിപിഎം നേതാക്കളുമായി ആശയവിനിമയം നടത്തിയതായാണ് സൂചന. 

കഴിഞ്ഞ നിയമസഭാ തെരഞ്ഞെടുപ്പില്‍ മൂന്നാം സ്ഥാനത്തേക്ക് പിന്തള്ളപ്പെട്ട സിപിഎമ്മിന് ഇത്തവണ നിര്‍ണായകമാണ്. ഇ ശ്രീധരന്‍ ബി.ജെ.പി വോട്ടുകള്‍ക്ക് പുറമെ സവര്‍ണവോട്ടുകളും പിടിച്ചിരുന്നു. സരിന്റെ സിവില്‍ സര്‍വീസ് പ്രൊഫൈല്‍ തെരഞ്ഞെടുപ്പില്‍ സഹായകരമാവുമെന്ന വിലയിരുത്തിലും സിപിഎമ്മിനുണ്ട്. 

മാത്രമല്ല രാഹുല്‍ മാങ്കൂട്ടത്തിലിന്റെ സ്ഥാനാര്‍ഥിത്വത്തിനെതിരെ നില്‍ക്കുന്ന കോണ്‍ഗ്രസ് വോട്ടുകളും സരിന് കിട്ടുമെന്നാണ് സിപിഎം കരുതുന്നത്. 

പാലക്കാട് നിയമസഭാ മണ്ഡലത്തിലേക്ക് രാഹുല്‍ മാങ്കൂട്ടത്തിലിനെ സ്ഥാനാര്‍ഥിയാക്കി പ്രഖ്യാപിച്ചതിനെതിരെ സരിന്‍ രംഗത്തെത്തിയിരുന്നു. പാര്‍ട്ടി തിരുത്തണമെന്നും പുനരാലോചിക്കണമെന്നും സരിന്‍ പറഞ്ഞിരുന്നു. എന്നാല്‍ മുതിര്‍ന്ന നേതാക്കളുള്‍പ്പെടെ സരിനെ തള്ളിപ്പറയുന്ന നിലപാടാണ് സ്വീകരിച്ചത്. 

cpim District Secretariat decided to make Palakkad Sarin a candidate