നീലേശ്വരം: കരിന്തളം പാലിയേറ്റീവ് കെയര്‍ സൊസൈറ്റിക്ക് കെട്ടിടമൊരുങ്ങുന്നു. കരിന്തളം പാറയിലെ സൊസൈറ്റിയുടെ പക്കലുള്ള ഒരേക്കര്‍ സ്ഥലത്തു നിന്നു 50 സെന്റ് പഞ്ചായത്തിനു കൈമാറിയാണ് ഇരുനില കെട്ടിടം പണിയുന്നത്. നബാര്‍ഡ് ഫണ്ട് ഉപയോഗിച്ചാണ് കെട്ടിടം നിര്‍മിക്കുന്നത്.
1.57 കോടിയോളം ചെലവുവരും. പൊതുമരാമത്തു വകുപ്പിനാണ് നിര്‍മാണ ചുമതല. എന്‍ഡോസള്‍ഫാന്‍ ബാധിത പ്രദേശങ്ങള്‍ക്ക് അനുവദിക്കുന്ന പ്രത്യേക പദ്ധതി പ്രകാരമാണ് നബാര്‍ഡ് തുക അനുവദിച്ചത്. 2006 ല്‍ പ്രവര്‍ത്തനം തുടങ്ങിയ സൊസൈറ്റി ആഴ്ചയില്‍ രണ്ടു ദിവസം സ്വന്തം നിലയിലും നാലുദിവസം പഞ്ചായത്തിന്റെ സഹകരണത്തോടെയും വീടുകളില്‍ ചെന്ന് രോഗികളെ പരിചരിക്കുന്നുണ്ട്. കെ.പി നാരായണന്‍ ചെയര്‍മാനും എന്‍.കെ നളിനാക്ഷന്‍ കണ്‍വീനറുമായ സമിതിക്കാണു സൊസൈറ്റിയുടെ നിയന്ത്രണം.