കൂടരഞ്ഞി: ആരോഗ്യ വകുപ്പും പഞ്ചായത്തും ശീതസമരത്തിലായതിനാല്‍ പ്രതിരോധ പ്രവര്‍ത്തനം പാളുന്നു എന്ന പരാതി ഉയര്‍ന്ന കൂടരഞ്ഞിയില്‍ ഒടുവില്‍ അധികൃതര്‍ ഉണര്‍ന്ന് പകര്‍ച്ചവ്യാധി പ്രതിരോധ പ്രവര്‍ത്തനങ്ങള്‍ ഊര്‍ജിതമാക്കി.
പഞ്ചായത്ത് ഹാളില്‍ സര്‍വകക്ഷി യോഗം വിളിച്ചുചേര്‍ത്ത് പ്രവര്‍ത്തനങ്ങള്‍ക്ക് രൂപം നല്‍കി. സമീപ പഞ്ചായത്തില്‍ നിപാ രോഗം കണ്ടെത്തിയതിനെത്തുടര്‍ന്ന് ഗ്രാമപഞ്ചായത്ത് പ്രസിഡന്റ് സോളി ജോസഫിന്റെ നേതൃത്വത്തില്‍ പ്രത്യേക ഭരണസമിതി യോഗം ചേര്‍ന്നു വിപുലമായ പ്രചാരണ പരിപാടികള്‍ക്ക് രൂപം നല്‍കി.
യോഗത്തില്‍ ആരോഗ്യ വകുപ്പ് ഉദ്യോഗസ്ഥരും പങ്കെടുത്തു. ഭീതിയല്ല വേണ്ടത് ജാഗ്രതയാണ് എന്ന സന്ദേശം മുന്‍നിര്‍ത്തി ഗ്രാമപഞ്ചായത്ത് മുഴുവനും ആയിരം പോസ്റ്ററുകളും 10000 ലഘുലേഖകളും വിതരണം ചെയ്തു. ഗ്രാമപഞ്ചായത്തില്‍ ഇതുവരെ നിപാ രോഗം റിപ്പോര്‍ട്ട് ചെയ്തിട്ടില്ലെന്നും ആരോഗ്യവകുപ്പ് നല്‍കുന്ന നിര്‍ദേശങ്ങളും മുന്‍കരുതലുകളും പാലിച്ചുകൊണ്ട് രോഗഭീഷണി ഒഴിവാക്കാമെന്നും മെഡിക്കല്‍ ഓഫിസര്‍ ഡോ.നൈസി തോമസും ഹെല്‍ത്ത് ഇന്‍സ്‌പെക്ടര്‍ നസീമും അറിയിച്ചു.