തിരുവനന്തപുരം: വെള്ളക്കരം പിരിച്ചടുക്കുന്നതില്‍ കഴിഞ്ഞ സാമ്പത്തിക വര്‍ഷം കേരള ജല അതോറിറ്റി സര്‍വകാല റെക്കോര്‍ഡെന്ന് ജലവിഭവ മന്ത്രി മാത്യു ടി. തോമസ്. ചാര്‍ജ് കൂട്ടാതെ ജലമോഷണം തടയുന്നതിലും വെള്ളക്കരം കൃത്യമായി പിരിച്ചെടുക്കുന്നതിലുമുള്ള നടപടിയിലൂടെയാണ് ഇത് സാധിച്ചത്. 2015-16 സാമ്പത്തികവര്‍ഷം അവസാനിക്കുമ്പോള്‍ വാര്‍ഷിക വരുമാനം 478.88 കോടി രൂപയായിരുന്നു. ഇക്കൊല്ലത്തെ വാര്‍ഷിക വരുമാനം 545.65 കോടി രൂപയാണ്. 66.77 കോടി രൂപയുടെ വര്‍ധന ഉണ്ടായതായും മന്ത്രി അറിയിച്ചു. 78 കോടി 28 ലക്ഷം രൂപയാണ് മാര്‍ച്ചിലെ വരുമാനം. 2016 മാര്‍ച്ചില്‍ ഇത് 54 കോടി 55 ലക്ഷം രൂപ ആയിരുന്നു. പുതിയ മന്ത്രിസഭ അധികാരത്തില്‍ വന്നതിനു തൊട്ടുപിന്നാലെ ജൂലൈ മാസത്തില്‍ മുന്‍വര്‍ഷത്തെ അപേക്ഷിച്ച് 18.5 ശതമാനം വര്‍ധനവുണ്ടായി.